Roblox video oyun platformasının səhmləri, şirkətin dördüncü rübündə gündəlik aktiv istifadəçi sayının analitiklərin proqnozlarından aşağı olduğu məlum olduqdan onra 20 faizə qədər ucuzlaşıb.
Marja xəbər verir ki, Şirkətin açıqladığı məlumatlara görə, dekabrın 31-də başa çatan üç aylıq dövrdə gündəlik aktiv istifadəçilərin sayı əvvəlki rüblə müqayisədə 4 faiz azalaraq 85,3 milyon nəfərə düşüb. Wall Street analitikləri bu rəqəmin 88,4 milyon olacağını gözləyirdilər. Oyunçuların "məşğulluğu" da üçüncü rüblə müqayisədə 9,7 faiz azalaraq 18,7 milyard saata düşüb.
Roblox-un Baş Maliyyə Direktoru Mike Guthrie Şərqi Avropada artımın "həqiqətən yavaş" olduğunu söyləyib. O, Türkiyədə qadağanın avqust ayında qüvvəyə minməsindən sonra ilk dəfə tam rüb ərzində platformadan tamamilə çıxarıldığını bildirib. Roblox-un bu qadağaya etiraz etdiyi də qeyd olunub.
Kaliforniyada yerləşən şirkətin dördüncü rübdə sifarişləri (satış) 1,36 milyard dollar təşkil edib, bu, 1,37 milyard dollarlıq proqnozdan aşağıdır.
Üçüncü tərəf tərtibatçılarına oyunlar hazırlamağa və gəlirdən pay qazanmağa imkan verən Roblox, son illərdə sürətlə böyüyüb. Bu həftə platformanın ən populyar oyunlarından biri onun anonim tərtibatçısından alınıb.
Şirkət rüb ərzində oyun tərtibatçılarına rekord məbləğdə 281 milyon dollar ödəyib. Baş direktor David Baszucki bu rəqəmin platforma vasitəsilə yaradıcılara ötürülən maliyyə dəstəyinin göstəricisi olduğunu vurğulayıb.
Roblox internetdə uşaqları qorumaq üçün kifayər qədər tədbir görmədiyi üçün tənqidlər ilə üzləşib. Keçən il şirkət 13 yaşından kiçik uşaqların sırf sosial qarşılıqlı əlaqə üçün nəzərdə tutulmuş oyunlara daxil olmasına mane olan yeni qaydalar tətbiq edib.
Roblox, 2025-ci il üçün ümumi sifarişlərin 5,2 milyard dollar ilə 5,3 milyard dollar arasında olacağını proqnozlaşdırır.
