Dubay dünyanın ən hündür binası olan "Bürc Xəlifə", dünyanın xəritəsini xatırladan 300 süni adadan ibarət "World" arxipelaqı kimi diqqətçəkən memarlıq layihələri ilə tanınır.
İndi isə "Therme Group" şirkəti Birləşmiş Ərəb Əmirliklərinin (BƏƏ) ən böyük şəhərinin siluetini daha da dəyişdirməyi planlaşdırır.
"Therme Dubai – Islands in the Sky" - "Səmada adalar" layihəsi
100 metr (328 fut) hündürlüyündə inşa ediləcək "Therme Dubai – Islands in the Sky" layihəsində havadan asılmış botanika bağları, müalicəvi termal və mineral sularla dolu hovuzlar, eləcə də mədəni və sosial tədbirlər üçün xüsusi məkanlar yer alacaq.
"Diller Scofidio + Renfro" (DS+R) memarlıq studiyası tərəfindən dizayn edilən bu unikal tikili Dubayın Zabil parkında, Kral Sarayının yaxınlığında yerləşəcək.
"Therme Group"un məlumatına görə, layihənin illik 1,7 milyon ziyarətçi qəbul etməsi nəzərdə tutulur və o, "gündəlik və hərtərəfli sağlamlıq anlayışına yeni standart gətirəcək".
Şirkətin qurucusu və baş icraçı direktoru Robert Hanea bəyanatında qeyd edib: "Dubay gələcəyin rifaha əsaslanmalı olduğunu anlayan bir şəhərdir. Biz şəhərlərin təbiəti, suyu və mədəniyyəti necə inteqrasiya edə biləcəyini formalaşdıraraq insanların həyat keyfiyyətini geniş miqyasda yüksəldirik. 'Therme Dubai – Islands in the Sky' ambisiya və mütəxəssisliyin birləşdiyi qlobal nümunə olacaq."
Memarlıq firmasının sözlərinə görə, bu layihə "səmada bir vahə" kimi təsvir edilir və göl üzərində bir sıra botanika bağlarından ibarət qüllə şəklində yüksələcək.
DS+R-nin təsisçi tərəfdaşı Elizabet Diller layihə ilə bağlı bildirib: "Hər ada termal hovuzlar, istirahət meydançaları və yaşıllıqla örtülmüş qapalı və açıq məkanlar üçün bir platformadır. Hər biri özünəməxsus atmosferə malikdir və Dubay siluetinin möhtəşəm mənzərəsinə yönəlib."
"Qonaqlar isti və sərin, yaş və quru mühitlərdə unikal təcrübə yaşayacaqlar – saunaların və buxar otaqlarının yüksək temperaturu ilə termal hovuzların və sərin mineral hovuzların mülayim atmosferi birləşəcək. Gündüzlər sakitlik və rahatlıq təmin edən bu məkanlar gecələr musiqi, incəsənət çıxışları və tədbirlərlə canlanacaq."
"Therme Group" layihənin ekoloji dayanıqlılığına da toxunub. Şirkətin açıqlamasına görə, termal hovuzlarda istifadə olunan suyun 90%-i təkrar emal ediləcək, havanın təmizlənməsi və soyutma ehtiyaclarının isə 80%-i təmiz enerji mənbələri ilə təmin olunacaq.
Tikintinin 2026-cı ildə başlanacağı və 2028-ci ildə tamamlanacağı bildirilir.
"Therme Dubai – Islands in the Sky" Dubayda qarşıdakı illərdə həyata keçiriləcək bir sıra iri miqyaslı memarlıq layihələrindən yalnız biridir.
Hazırda dünyanın ikinci ən hündür göydələni olacaq "Burc Azizi"nin inşası davam edir və onun 2028-ci ildə tamamlanacağı gözlənilir.
725 metr (2 379 fut) hündürlüyündə və 131 mərtəbədən ibarət olacaq bu göydələndə yaşayış mənzilləri, "yeddi ulduzlu" otel və "şaquli" ticarət mərkəzi yer alacaq. "Azizi Developments" şirkəti binanın dünyanın ən hündür otel lobbi salonu, ən yüksək hündürlükdə yerləşən gecə klubu və ən yüksək müşahidə meydançası kimi bir neçə rekord qıracağını bildirib.
Bundan əlavə, "Ciel Dubai Marina" adlı dünyanın ən hündür otelinin də bu il açılacağı planlaşdırılır.
365 metr (1 200 fut) hündürlüyündə olacaq bu otel 82 mərtəbədə 1 000-dən çox otaq və lyuks suitlər təklif edəcək.
Rəhim
