Danimarkada aparılan genişmiqyaslı araşdırma başağrısı pozğunluqları ilə intihar riski arasında əhəmiyyətli bir əlaqə olduğunu ortaya qoyub.
AzEdu.az xəbər verir ki, “JAMA Neurology” jurnalında nəşr edilən tədqiqatın nəticələrinə görə, miqren, gərginlik tipli baş ağrısı, travma sonrası başağrısı diaqnozu qoyulmuş şəxslər arasında həm intihara cəhd, həm də tamamlanmış intihar halları daha yüksəkdir.
Tədqiqat 1995-2020-ci illər arasında ilk dəfə başağrısı diaqnozu qoyulmuş 15 yaş və yuxarı Danimarka vətəndaşlarını əhatə edib. Xəstələrin təsnifatında Beynəlxalq Xəstəliklər Təsnifatının diaqnostik kodlarından istifadə olunub.
Araşdırmanın nəticələrinə əsasən, başağrısı pozğunluğu olan fərdlərin 15 illik mütləq intihara cəhd riski nəzarət qrupundakı 0,33 faizə qarşı 0,78 faiz təşkil edib (risk fərqi: 0,45 faiz). Tamamlanmış intihar riski isə başağrısı diaqnozu qoyulmuş şəxslərdə 0,21 faiz, nəzarət qrupunda isə 0,15 faiz olub (risk fərqi: 0,06 faiz).
Daha spesifik nəticələrə görə, miqren - intihara cəhd üçün düzəliş edilmiş təhlükə nisbəti (HR) 1,71, tamamlanmış intihar üçün isə 1,09 olub. Gərginlik tipli başağrısı - intihara cəhd üçün HR 1,91, tamamlanmış intihar üçün 1,44 olub. Travma sonrası başağrısı - intihara cəhd üçün HR 3,14, tamamlanmış intihar üçün 3,22 olub.
Başağrısı pozğunluğu olan şəxslərdə xərçəng, ürək-damar xəstəlikləri, xroniki obstruktiv ağciyər xəstəliyi, insult, kəllə-beyin travması, əhval-ruhiyyə pozğunluqları pozğunluqları kimi birgə tibbi və psixiatrik problemlərin daha yüksək yayılması müşahidə olunub.
Araşdırma göstərir ki, başağrısı pozğunluğu olan şəxslərdə intihar riski əhəmiyyətli dərəcədə yüksəlir və bu əlaqə digər psixiatrik və tibbi amillər nəzərə alındıqdan sonra da mövcud qalır. Tədqiqatçılar başağrısı diaqnozu qoyulmuş şəxslərin erkən qiymətləndirilməsinin və davranış sağlamlığı müdaxilələrinin vacibliyini vurğulayırlar.
