İran hərbi qüvvələri lazım gələrsə Hörmüz boğazını bağlaya bilər.
Heftelik.az-ın “Tasnim”ə istinadən verdiyi məlumata görə, bunu İslam İnqilabı Keşikçiləri Korpusunun (“Sepah”) Hərbi Dəniz Qüvvələrinin komandanı Əlirza Tanqsiri Bəndər-Abbasda jurnalistlərə açıqlamasında bildirib.
Əlirza Tanqsiri deyib ki, hərbi güc tətbiq edərək Hörmüz boğazını bağlaya bilərlər: “Lakin biz özümüz boğazdan istifadə etdiyimiz müddətdə bunu etməyəcəyik”.
Komandan vurğulayıb ki, ABŞ heç vaxt İran neftinin ixracını dayandırmaq məqsədinə nail ola bilməyəcək. O, Tehranın qarşısında regional sabitliyi və İran neft və qazının təhlükəsiz ixracını təmin etmək kimi əsas məqsədlərin durduğunu xatırladıb.
Xatırladaq ki, daha öncə ABŞ Prezidenti Donald Tramp İrana qarşı maksimum təzyiq siyasətinin bərpasını nəzərdə tutan fərman imzalamışdı. Bundan sonra Tramp İranla silahlı qarşıdurmaya getmək niyyətində olmadığını və qarşıdurmadan qaçmaq üçün Tehranla İran nüvə problemi üzrə saziş bağlamaq istədiyini açıqlamışdı.
