Tanınmamış Dnestryanı bölgəsi qazın alınması üçün Avropa İttifaqının maliyyə yardımından imtina edib.
“İki sahil” xəbər verir ki, bunu Moldovanın baş naziri Dorin Reçean sosial şəbəkədə bəyan edib.
Onun sözlərinə görə, Moldova hökuməti Tiraspolun qərarına baxmayaraq, Macarıstan şirkəti vasitəsilə Dnestr çayının sol sahilinə qaz tranzitini əngəlləməyəcək. Bunun müqabilində Kişinyov Tiraspoldan qarşılıqlı addımlar tələb edir.
“Ortamüddətli perspektivdə Aİ-nin 60 milyon avroluq təklifi Dnestryanı bölgəni şantajdan və enerji qeyri-sabitliyindən azad edəcək bir həll idi. Lakin Tiraspol bu qərarı rədd etdi”, – deyə, Moldova hökumətinin rəsmi Telegram kanalında bildirilir.
Qeyd edilir ki, Tiraspolun rədd etdiyi əsas şərt istehlakçılar üçün tariflərin tədricən artırılması olub. Nəticədə onlar 60 milyon avroluq Avropa yardım paketindən istifadə edə bilməyiblər.
Bu arada, Moldovanın baş nazirinin verdiyi məlumata görə, Macarıstanın MET Gas and Energy Marketing AG ticarət şirkətinin iştirakı ilə sol sahilə qaz axını davam edəcək. Təchizat sxemi o deməkdir ki, MET Gas and Energy Marketing AG Moldovaqaz ilə imzalanmış müqaviləyə uyğun olaraq Moldova ilə sərhədə qaz tədarük edəcək və Tiraspol Moldovaqaz və Tiraspoltransqaz arasında bağlanmış müqavilə əsasında Moldova ilə sərhəddən regiona qaz tranzitinin xərclərini əvvəlcədən ödəyəcək. Moldova baş naziri eyni zamanda qeyd edib ki, bu, uzunmüddətli problemin həlli deyil.
