Bakı, TurkicWorld
ABŞ Prezidenti Donald Trump-ın Çinə tətbiq etdiyi 10 faizlik tariflər əczaçılıq sənayesinə ciddi təsir göstərir.
TurkicWorld AzerVoice -ə istinadən xəbər verir ki, ekspertlər xəbərdarlıq edirlər ki, bu tariflər antibiotiklər, xərçəng dərmanları, ağrıkəsicilər, qan durulaşdırıcılar və digər generik dərmanların qiymətinin artmasına və qıtlığa səbəb olacaq.
ABŞ Ticarət Komissiyasının məlumatına görə, 2023-cü ildə ABŞ Çindən 2,02 milyard dollardan çox dəyərində dərman idxal edib.
Trump-ın tarifləri əczaçılıq zəncirini pozaraq çatışmazlıqlara səbəb ola bilər. Amerika Xəstəxanalar Assosiasiyası Prezidentə göndərdiyi məktubda tibbi avadanlıq və dərmanların tariflərdən azad edilməsini xahiş edərək, çatışmazlıqların xəstələri "ölüm də daxil olmaqla ciddi risklər" ilə üzləşdirə biləcəyini bildirib.
Amerika Xəstəxanalar Assosiasiyası qeyd edir ki, Çin ABŞ-ın aktiv əczaçılıq inqrediyentlərinin təxminən 30%-ni təmin edir. Çin həm də ABŞ-ın tibbi avadanlıq təchizatının əsas mənbələrindən biridir. Birdəfəlik qan təzyiqi monitorları, stetoskop örtükləri, anesteziya alətləri, üz maskaları və plastik əlcəklərin təxminən üçdə biri Çindən idxal olunur.
Harvard Tibb Məktəbinin professoru Aaron Kesselheim qeyd edir ki, tariflərin uzunmüddətli təsirləri, o cümlədən çatışmazlıqlar və dərman qiymətlərinin artması, bir neçə ay ərzində hiss ediləcək. ABŞ-ın öz dərman istehsalını artırmaq üçün vaxt lazımdır və bu proses bir gecədə həyata keçirilə bilməz.
