Elektromobil istehsalında ABŞ-ın Tesla şirkətinin ən böyük rəqibi olan Çin markası BYD, 9600 dollar qiymətinə satışa təqdim edəcəyi "Seagull" büdcə hetçbek modeli də daxil olmaqla, bütün avtomobil modelləri üçün inkişaf etdirdiyi yeni avtonom idarəetmə sistemini təqdim edib.
Marja xəbər verir ki, “Tanrının Gözü” (God's Eye) adlandırılan sistem tamamilə BYD-nin öz mühəndis komandası tərəfindən hazırlanıb və markanın kütləvi bazar modellərinə adətən lüks seqmentli avtomobillərdə olan uzaqdan parketmə və avtonom ötmə kimi qabaqcıl xüsusiyyətləri də əlavə edəcək.
“Avtonom sürücülük texnologiyası hər kəs üçün əlçatan olacaq”
BYD-nin baş direktoru Vanq Çuanfu (Wang Chuanfu) şirkətin Şençjendəki baş ofisində təqdimat zamanı çıxış edərək, avtonom idarəetmə texnologiyasının artıq hər kəs üçün əlçatan olduğunu vurğulayıb. "Qabaqcıl sürücüyə yardım sistemləri lüks deyil, təhlükəsizlik kəmərləri və təhlükəsizlik yastıqları kimi avtomobilin əsas xüsusiyyətinə çevrilir", - Vanq deyib.
Açıqlamalardan sonra BYD-nin Honq-Konqda səhmləri bahalaşıb. Şirkətin səhmləri keçən həftədən bəri 21 faiz dəyər qazanıb, çünki investorlar şirkətin avtonom sürücülük planları ilə bağlı yeniləmələri gözlədilər.
"S&P Global Mobility"nin analitiki Lu Daokuan qeyd edib ki, "Tanrının Gözü" sisteminin tətbiqi 150.000 yuandan (Renminbi RMB) aşağı olan avtomobillər üçün avtonom sürücülük bazarında əhəmiyyətli bir boşluğu doldurur.
