Bakıda hərəkətdə olan sürət qatarını stansiyada qarşısına keçərək dayandıran şəxs saxlanılıb.
Demokratikmusavat.com -ın Qaynarinfo-ya istinadən məlumatına görə, 1984-ci ildə Ağstafa rayonunda anadan olmuş H.K. saxlanılaraq, barəsində İnzibati Xətalar Məcəlləsinin 510-cu maddəsi ilə protokol tərtib edilib və iş məhkəməyə göndərilib.
Məhkəmədə məlum olub ki, gecə 00:10 radələrində Balakən-Bakı sürət qatarı Keşlə stansiyası ərazisindən keçən zaman H.K. hərəkətdə olan qatarın qarşısına keçərək dayandırıb.
O, özünü təqsirli bilərək izahatında göstərib ki, dəmir yolu stansiyasında gəzən zaman qaranlıq olduğundan bilmədən qatar yoluna çıxıb və qəfldən qatarın gəldiyini görüb. Özünü itirdiyindən qatar yolundan çıxa bilməyib. Nəticədə hərəkətdə olan qatarın qarşısına keçərək onu dayandırıb.
Məhkəmənin qərarı ilə H.K. 50 manat məbləğində cərimə edilib.
