Ukrayna hakimiyyəti ABŞ-ın Ukraynanın nadir torpaq ehtiyatlarından təhlükəsizlik zəmanətlərinin tərkib hissəsi kimi istifadəsi təklifini nəzərdən keçirməlidir. Busaat.az xəbər verir ki, bunu ABŞ prezidentinin Rusiya və Ukrayna üzrə xüsusi nümayəndəsi Keyt Kelloq Fox Business telekanalına müsahibəsində deyib.
“Düşünürəm ki, iqtisadi əməkdaşlığa başlamaq əla ideyadır, çünki bu, Ukraynanın təhlükəsizliyini təmin edəcək. Onlar biləcəklər ki, Birləşmiş Ştatlar iqtisadi cəhətdən iştirak edir və bizim Ukraynada iqtisadi marağımız var. Bu, Ukrayna üçün təhlükəsizlik zəmanətlərinin bir hissəsidir və onlar buna belə baxmalıdırlar”, – deyə rəsmi bildirib.
O, həmçinin yaxın bir neçə gün ərzində Kiyevin nadir torpaq metalları sektorunda təklif olunan sövdələşmə ilə razılaşacağına ümid etdiyini bildirib.
“Onların çoxlu qiymətli metalları var. (ABŞ) maliyyə naziri Kiyevdə idi, o, (Ukrayna prezidenti) Zelenski ilə müzakirəyə getmişdi… ABŞ tərəfindən göstərilən yardımın həcmini nəzərə alaraq qiymətli metallarla ödənişlər”, – Kelloq əlavə edib.
