Azərbaycan Ermənistanı yenə beynəlxalq məhkəməyə verib.
Azərbaycan Xarici İşlər Nazirliyi bildirib ki, fevralın 12-də Ermənistanı Haaqadakı Daimi Arbitraj Məhkəməsinə şikayət edib ki, bu ölkə işğal zamanı "Bern Konvensiyası"nı pozub.
Məlumata görə, Azərbaycan Ermənistan tərəfindən yaşayış yerlərinin və canlı təbiətin kütləvi şəkildə məhv edilməsinə görə bu ölkədən tam təzminat tələb edir.
Ermənistan tərəfi əsassız hesab etdiyi Azərbaycanın tələblərinə, o cümlədən təzminat tələbinə etiraz etmək niyyətindədir.
Rəsmilər deyir ki, qarşılıqlı məhkəmə iddialarından əl çəkmək sülh sazişində Azərbaycanın və Ermənistanın razılaşmadıqları iki maddədən biridir. Ermənistan Baş Naziri Nikol Paşinyan fevralın əvvəlində deyib ki, Ermənistan beynəlxalq məhkəmələrdən şikayətini geri çəkə bilər.
"Burada əsas ideya ondan ibarətdir ki, bütün şikayətləri geri götürülsün. Ümumilikdə biz bu fikirlə razıyıq. Bəs, bizim təklifimiz nədir? Nəinki bütün şikayətləri geri götürmək, hətta ikitərəfli münasibətlərdə bütün bu məsələləri gündəmə gətirməmək lazımdır", - Paşinyan deyib.
İki ay əvvəl Azərbaycan Prezidenti İlham Əliyev Rusiya mətbuatına müsahibəsində demişdi ki, Ermənistanla sülh sazişi barədə danışıqlarda böyük irəliləyiş əldə edilib, 17 maddədən 15-i razılaşdırılıb, ikisi qalıb.
"Onlardan biri bir-birinə qarşı beynəlxalq iddialardan kənarda durmaqdır. Zənnimcə, bu, qarşılıqlı şəkildə qəbul olunan maddədir. Bu yaxınlarda biz vurulmuş zərərin təhlilini başa çatdırdıq, həm də bunu ətraflı etdik. Biz buna 4 il vaxt sərf etdik və orada hər şey sənədlərlə qeyd olunub. Bu, təqribən 150 milyard dollardan çoxdur, yəni, işğal illərində vurulan zərərdir. Ona görə də zənnimcə, qarşılıqlı iddiaları kənara qoymaq hər iki tərəf üçün qəbulediləndir", - Əliyev bildirib.
Buna kimi 2021-ci ildə Ermənistan və Azərbaycan BMT-nin Beynəlxalq Ədalət Məhkəməsində bir-birinə qarşı uzun illər davam etmiş Qarabağ münaqişəsindən və İkinci Qarabağ müharibəsindən sonra məhkəmə iddiaları qaldırıb. Ölkələr bir-birini müvafiq olaraq, irqi, milli və etnik mənsubiyyətlərinə görə ayrı-seçkilikdə ittiham edib.
Videonu YouTube kanalımızdan izləyin.
