O.Musayev qeyd edib ki, dəm qazının vaxtında aşkar edilməsinin ən effektiv yollarından biri qaz detektorlarının istifadəsidir: “Avropa ölkələrində bu detektorların quraşdırılması geniş yayılıb və bu işlə lisenziyalı şirkətlər məşğul olur. Təəssüf ki, ölkəmizdə hələ də qaz detektorlarının quraşdırılması ilə bağlı effektiv tədbirlər görülmür. Bununla belə, hər kəs fərdi şəkildə satış məntəqələrindən qaz detektoru əldə edib istifadə edə bilər. Dəm qazından qorunmağın ən vacib yolu düzgün havalandırmanı təşkil etməkdir. Evlərdə və digər qapalı məkanlarda mütəmadi olaraq havalandırma aparmaq zəhərlənmə riskini xeyli azalda bilər”.Bəs mənzillər qazlaşdırılarkən sayğacla yanaşı, detektorlarla da təmin olunur?“Azəriqaz” İstehsalat Birliyinin İctimaiyyətlə əlaqələr şöbəsinin rəisi Eldəniz Vəliyev Metbuat.az-ın sorğusuna cavab olaraq bildirib ki, mənzillərin qazlaşdırılmasını “Azəriqaz” İB həyata keçirmir:“İstənilən mənzilin qazlaşdırılması məqsədilə ASAN Kommunala xüsusi mülkiyyət sənədləri ilə müraciət edilir. Əgər mənzil yeni standartlara və texniki parametrlərə uyğun olarsa, “Azəriqaz” İB həmin müraciət əsasında texniki şərt hazırlayaraq sahibkara təqdim edir. Bundan sonra sahibkar xüsusi lisenziyası olan podratçı şirkətlərdən birini seçərək binanın qazlaşdırılmasını həyata keçirir. Biz yalnız texniki şərti təqdim edirik.Detektorlar məsələsinə gəlincə, “Azəriqaz” İstehsalat Birliyi texniki şərti təqdim edərkən detektorların quraşdırılmasını məcburi qaydada qeyd edir. Yəni texniki şərtdə bu tələb öz əksini tapır. Əgər yeni tikilən binalarda detektorlar quraşdırılmırsa, “Azəriqaz” İB həmin binanın qazlaşdırılmasını təhvil almır, çünki texniki şərtin tələbləri yerinə yetirilməmiş sayılır”.Qurum rəsmisi qeyd edib ki, köhnə binalarda isə vəziyyət bir qədər fərqlidir:“Bu hallarda yalnız texniki müayinələr zamanı “Azəriqaz” İstehsalat Birliyinin əməkdaşları mənzil sahiblərinə detektorları öz şəxsi vəsaitləri hesabına əldə etməyi tövsiyə edirlər. Bunun üçün böyük maliyyə vəsaiti tələb olunmur və onların quraşdırılması vacib təhlükəsizlik tədbiri hesab olunur. Lakin yeni binalarda detektorların quraşdırılması artıq məcburi şərt kimi irəli sürülür və qazlaşdırma yalnız bu tələb yerinə yetirildikdə həyata keçirilir. Sevinc İbrahimzadə / Metbuat.az
