“Caspian Energy Club” üzvləri Veysəloğlu Şirkətlər Qrupuna məxsus Logistika Mərkəzində olublar.
“CEO Tour” çərçivəsində “Caspian Energy Club”a üzv olan 40-dək sahibkarlıq subyektinin rəhbəri Məmmədli qəsəbəsində yerləşən Logistika Mərkəzinin fəaliyyəti ilə yaxından tanış olub.
“CEO Tour” zamanı sahibkarlara Logistika Mərkəzinin əməliyyat prinsipləri, müasir texnologiyaların tətbiqi və təchizat zəncirinin idarə edilməsi barədə ətraflı məlumat verilib.
Tədbir iştirakçıları anbar idarəetmə sistemləri, yüklərin qəbulu və paylanması prosesi ilə tanış olub, logistika sahəsində innovativ həllər barədə məlumat əldə ediblər. Bildirilib ki, Qafqazın ən böyük logistika mərkəzlərindən biri olan Veysəloğlu Logistika Mərkəzi Keyfiyyət idarəetmə və Əməyin mühafizəsi üzrə beynəlxalq İSO 9001 standartlarına layiq görülüb.
Logistika Mərkəzi 22 hektar sahəni əhatə edir və bunun 9 hektarında 95 min palet tutumuna malik qapalı anbar yerləşir. Anbarda 20 min növ quru qida və qeyri-qida, 120 çeşid meyvə-tərəvəz, 400 növ soyuq və donmuş məhsullar saxlanılır. Anbar gündəlik 6000 palet mal qəbul edir və 4000 mağazaya məhsul təminatını həyata keçirir.
