Xalqımız 33 ildir ki, erməni vandallarının insanlıq əleyhinə törətdiyi qanlı cinayətin – Xocalı soyqırımının ağrısını, dəhşətlərini qəlbində, həyatında daşıyır. Bu cinayət aktının bütün dünyada tanınmasına nail olmaq qarşımızda duran vəzifələrdəndir. 2012-ci ilin yanvarında İslam Əməkdaşlıq Təşkilatına üzv dövlətlərin Parlament İttifaqının İndoneziyanın Palembanq şəhərində keçirilən VII sessiyasında 51 ölkənin parlament nümayəndəsi Xocalı faciəsinin beynəlxalq səviyyədə soyqırımı kimi tanınması ilə bağlı müvafiq qətnamə qəbul edib. İndiyədək 18 dövlətin milli qanunvericilik orqanı Xocalı faciəsini soyqırımı və Azərbaycana qarşı cinayət aktı sayıb. Bundan əlavə, Xocalı soyqırımı ABŞ-ın 24 ştatı tərəfindən də tanınıb.
“Azərbaycanın ağrısını qəlbimizdə daşıyırıq”
Türkiyə Xarici İşlər Nazirliyi Xocalı soyqırımı qurbanlarının xatirəsini yad edib. Bu barədə nazirliyin rəsmi saytında məlumat yayılıb.
“Düz 33 il əvvəl Xocalıda qətlə yetirilən günahsız azərbaycanlı qardaşlarımızın əziz xatirəsini rəhmət və ehtiramla yad edir, Azərbaycanın ağrısını qəlbimizdə daşıyırıq”, - məlumatda qeyd olunub.
“Xocalı Türk dünyasının ortaq yarasıdır”
Türkiyənin Eskişehirində Xocalı soyqırımının 33-cü ildönümü ilə bağlı konfrans keçirilib. Eskişehir Azərbaycanlılar Dərnəyi tərəfindən təşkil olunan “Xocalı soyqırımı: Unutmadıq, Unutmayacağıq!” mövzusunda anım konfransında şəhər ictimaiyyətinin nümayəndələri iştirak ediblər. Tədbirdə Xocalı soyqırımı zamanı həyatını itirənlər yad edilib, beynəlxalq ictimaiyyətə “Xocalıya Ədalət!” çağırışı olunub. Anadolu Universitetinin jurnalistika bölümünün tələbəsi Nərmin Qasımzadənin aparıcılıq etdiyi tədbirdə çıxış edən Eskişehir Azərbaycanlılar Dərnəyinin sədri Cavid Aydın, onun müavini Sirac Yaquboğlu və Eskişehir Türk Ocağının sədri, professor Nedim Ünal Xocalı soyqırımının təkcə Azərbaycanın deyil, bütün Türk dünyasının ortaq yarası olduğunu vurğulayaraq, uzun illər keçməsinə baxmayaraq bu qanlı hadisə üçün ədalət mübarizəsinin hələ də davam etdiyini xatırladıblar. Natiqlər bu faciənin tarixi yöndən qiymətləndirilməsinin vacibliyini, tarixdən dərs çıxarmağın zəruriliyini qeyd etdilər, bu fəaliyyətdə Türk dünyasının birliyinin önəmindən danışdılar.
Konfransın əsas məruzəçisi beynəlxalq münasibətlər üzrə mütəxəssis Mehmet Gökhan Özçubukçu Xocalıda baş verənlərin beynəlxalq hüquq çərçivəsində soyqırımı kimi tanınmasının və cinayətkarların məsuliyyətə cəlb olunmasının vacibliyini vurğuladı.
“Biz daim Xocalını anırıq”
Belə bir gündə Azərbaycan hökuməti və xalqı ilə həmrəy olduqlarını bildirən Türk Dövlətləri Təşkilatının (TDT) Baş katibi Kubanıçbek Ömüraliyev bu barədə özünün “X” sosial hesabında paylaşım edib. “Bu gün biz müasir tarixin ən faciəli və qəddar aktlarından biri olan Xocalı soyqırımının 33-cü ildönümünü qeyd edirik” yazan TDT-nin Baş katibi K.Ömüraliyev günahsız azərbaycanlı qurbanların xatirəsini ehtiramla yad etdiyini, Azərbaycan hökuməti və qardaş xalqı ilə sarsılmaz həmrəyliyi təsdiqlədiyini qeyd edib. TDT-nin rəhbəri paylaşımına “Xocalı soyqırımı”, “Biz daim anırıq”, “TDT” həşteqlərini də əlavə edib.
“Pakistan hər zaman Azərbaycanla həmrəydir”
Pakistanın Bakıdakı səfiri Qasım Mohiuddin Xocalı soyqırımının ildönümündə Azərbaycanla həmrəy olduğunu bildirib. Səfir bu barədə “X” sosial şəbəkəsindəki səhifəsində paylaşım edib. “Pakistan Azərbaycanla həmrəydir və Xocalı soyqırımı qurbanlarının xatirəsini ehtiramla yad edir”, – paylaşımda deyilir.
Qeyd edək ki, bu gün dünyanın müxtəlif ölkələrində Ermənistan silahlı qüvvələri tərəfindən Rusiyanın 366-cı motoatıcı alayının iştirakı ilə Azərbaycanın Xocalı şəhərinin işğalı və Xocalı soyqırımının törədilməsinin 33-cü ildönümü qeyd edilir, faciə qurbanlarının xatirəsi ehtiramla anılır. 1992-ci il fevralın 25-dən 26-na keçən gecə Xocalı şəhərinə hücum edən erməni silahlı quldurları, vandalları canını qurtarmaq, xilas olmaq üçün Ağdam istiqamətində hərəkət edən 2 min 500-dən çox dinc sakini – qoca, qadın və uşaqları gülləbaran ediblər.
“Xocalı soyqırımının baiskarları mütləq cəzalarını alacaqlar”
Azərbaycanın Qətərdəki səfirliyində Xocalı soyqırımının 33-cü ildönümü ilə əlaqədar anım tədbiri keçirilib. Tədbirdə səfirliyin əməkdaşları və Qətərdə yaşayan Azərbaycan icmasının üzvləri iştirak ediblər.
Tədbirdə çıxış edən Azərbaycanın Qətərdəki səfiri Adış Məmmədov Xocalı qətliamının bəşər tarixinə ən qanlı səhifələrdən biri kimi həkk olunduğunu və xalqımızın yaddaşında heç zaman silinməyəcəyini qeyd edib. Səfir bildirib ki, Ermənistanın sabiq prezidenti Serj Sarkisyanın vaxtilə Xocalı soyqırımı ilə bağlı verdiyi açıqlamaları bu qətliamın Azərbaycan xalqına qarşı etnik zəmində nifrət siyasətinin nəticəsi olaraq həyata keçirildiyini bir daha nümayiş etdirib.
Azərbaycan torpaqlarının Ermənistan tərəfindən işğalı dövründə Qarabağ regionunda hərbi cinayətlər törətmiş erməni canilərinin bəzilərinin bu gün Bakıda ədalət məhkəməsi qarşısına çıxarıldığını vurğulayan A.Məmmədov Xocalı soyqırımının baiskarları Robert Koçaryan, Serj Sarkisyan və Seyran Ohanyanın da ədalət məhkəməsi qarşısında cavab verəcəklərini bildirib.
Tədbirin sonunda iştirakçılar səfirliyin foyesində təşkil olunmuş Xocalı soyqırımı ilə bağlı fotostend, həmçinin soyqırımı haqqında faktlara əsaslanan ərəb və ingilis dilində çap olunmuş kitablarla tanış olublar.
“Bu faciə bütün dünya üçün ibrət dərsidir”
Tbilisidəki Mirzə Fətəli Axundov adına Azərbaycan Mədəniyyət Muzeyində Xocalı soyqırımının 33-cü ildönümü ilə əlaqədar anım mərasimi keçirilib. Tədbir Azərbaycanın Gürcüstandakı səfirliyinin təşkilatçılığı ilə baş tutub. Anım mərasimində Xocalıdan olan Gürcüstan vətəndaşı, Marneuli sakini Gülnaz Çıldırlı, Azərbaycan icmasının üzvləri, eləcə də, gürcüstanlı ekspertlər iştirak ediblər.
Azərbaycanın Gürcüstandakı səfiri Faiq Quliyev çıxışında Xocalı soyqırımı haqqında tədbir iştirakçılarına məlumat verib. Diplomat Xocalı soyqırımının tarixdə baş vermiş ən dəhşətli hadisələrdən biri olduğunu, xüsusilə bu soyqırımının müharibə qanunlarına zidd olaraq uşaqların, qadınların və qocaların qətlə yetirilməsinin vəhşilik olduğunu qeyd edib. Səfir, həmçinin Xocalı faciəsinin xalqın yaddaşında əbədi olaraq qalacağını və bu cür soyqırımlara qarşı mübarizənin vacibliyini önə çəkib: “Bu faciə yalnız Azərbaycan xalqı üçün deyil, bütün dünya üçün dərs olmalıdır.
Anım mərasiminin iştirakçıları Xocalı soyqırımının və digər insanlıq əleyhinə törədilən cinayətlərin qurbanlarını bir daha yad edərək, bu kimi faciələrin təkrarlanmaması üçün beynəlxalq əməkdaşlığın vacib olduğunu bildiriblər.
“Xocalı şəhidlərinin qanı yerdə qalmadı”
İsveçdə Xocalı faciəsi qurbanlarının xatirəsi ehtiramla yad edilib. Xocalı soyqırımın 33-cü ildönümü ilə əlaqədar Azərbaycanın İsveçdəki səfirliyi tərəfindən məşhur isveçli diplomat Raul Vallenberq adına mərkəzi Stokholm meydanında faciə qurbanlarının xatirəsi ehtiramla anılıb.
Mərasimdə çıxış edən Azərbaycanın İsveç Krallığındakı səfiri Zaur Əhmədov Xocalı soyqırımının insanlığa qarşı ən qəddar cinayətlərdən biri olduğunu bildirərək, 613 günahsız azərbaycanlının amansız şəkildə qətlə yetirilməsi ilə nəticələnən faciənin dünyanın onlarca ölkəsi tərəfindən qətliam kimi tanındığını diqqətə çatdırıb: “Müzəffər Azərbaycan Ordusunun qəhrəmanlığı sayəsində Xocalı şəhidlərinin qanı yerdə qalmadı. Ordumuz Prezident, Ali Baş Komandan İlham Əliyevin rəhbərliyi ilə ərazi bütövlüyümüzü bərpa etdi və bu tarixi qələbə sayəsində Azərbaycan xalqı gələcəyə daha da inamla irəliləyəcək”.
Tədbirin sonunda memorialın önünə əklil və soyqırımı qurbanlarını simvolizə edən daş abidələrin üzərinə qərənfillər düzülüb.
Hazırladı:
İ.HƏSƏNQALA
XQ
