ABŞ prezidenti Donald Trampın Ukraynaya qarşı sərt mövqe sərgiləməsindən sonra Rusiyada insanların gələcəklə bağlı gözləntiləri yaxşılaşıb. Aparılan sorğuya görə, cəmiyyətin əhəmiyyətli hissəsi yaxın 6 ay - 1 il ərzində həyat şəraitinin yaxşılaşacağına inanır. İctimai Rəy Fondunun (FOM) apardığı araşdırmada, iştirakçıların 35 faizi ölkənin yaxın gələcəkdə daha yaxşı vəziyyətə düşəcəyini düşündüyünü deyib.
Hafta.az-ın yazdığına görə, bu fikirlə ən çox razılaşan qrup 18-30 yaş arası gənclərdir (42 faiz). Bununla yanaşı, respondentlərin 36 faizi ölkə üzrə hər hansı dəyişiklik gözləmir, 12 faizi isə vəziyyətin daha da pisləşəcəyini proqnozlaşdırır.
İctimaiyyət öz ailələrinin gələcəyi ilə bağlı daha nikbin görünür. Respondentlərin 40 faizi altı ay və ya bir il ərzində ailələrinin həyat səviyyəsinin yüksələcəyinə inanır. Bu nikbinlik xüsusilə gənclər arasında yüksəkdir. 18-30 yaş qrupunda iştirak edənlərin 65 faizi ailələrinin qarşıdakı dövrdə daha yaxşı şəraitə sahib olacağını düşünür. Lakin 34 faiz heç bir dəyişiklik gözləmədiyi halda, 7 faiz yaşayış şəraitinin daha da pisləşəcəyinə inanır.
Uzunmüddətli perspektivdə optimizm daha da artır. Respondentlərin 45 faizi Rusiyada yaşayış şəraitinin 3-5 ildən sonra yaxşılaşacağını düşünür. Digər tərəfdən, 20 faiz heç bir dəyişiklik gözləmədiyi halda, yüzdə 12-si mənfi hadisələrin olacağını proqnozlaşdırır. Araşdırmalar göstərir ki, Rusiya ictimaiyyətinin 2022-ci ildən etibarən gələcəklə bağlı daha müsbət gözləntiləri var. Gələcəyə nikbin baxanların nisbəti 2017-2021-ci illər arasında yüzdə 24-36 arasında dəyişdiyi halda, bu nisbət 2022-ci ildə 45 faizə yüksələrək 2023-cü ilin sonunda yüzdə 42, 2024-cü ilin sonunda isə yüzdə 44 olaraq qeyd edilib.
