Kriptovalyuta bazarı, ABŞ Prezidenti Donald Trampın ticarət siyasətinə dair son açıqlamalarından sonra kəskin satış dalğası ilə qarşılaşıb. ABŞ-nin Meksika, Kanada və Çinə qarşı gömrük tariflərini rəsmi olaraq tətbiq etməsi bazarlarda riskdən qaçınma hissini gücləndirib. Nəticədə "Bitcoin"("BTC") və aparıcı altkoinlərdə ciddi düşüşlər müşahidə olunub.
Valyuta.Az "Investing.com"a istinadən xəbər verir ki, "Coinglass" məlumatlarına görə, son 24 saat ərzində ümumi likvidasiya məbləği 1,09 mlrd. dollara çatıb.
Trampın kriptovalyuta açıqlaması və ani yüksəliş
Bazar günü Trampın "Cardano" ("ADA"), "XRP" və "Solana"("SOL") da daxil olmaqla, ABŞ-nin kriptovalyuta ehtiyatı yaratmaq planını elan etməsi bazarda böyük nikbinlik yaradıb və "BTC"nin qiyməti 93.000 dollara qədər yüksəlib. Lakin bu optimizm cəmi bir gün davam edib. Ticarət müharibələrinin yenidən gündəmə gəlməsi ilə investorlar riskdən qaçmağa başlayıb və bazarlarda ciddi itkilər qeydə alınıb. Son 24 saat ərzində "BTC" 10%-dən çox dəyər itirərək 82.400 dollara qədər enib, "Ethereum" ("ETH") isə 2.000 dollar həddinə düşüb.
1 mlrd. dollarlıq likvidasiya və altkoinlərdə kəskin eniş
"BTC"nin qiymətindəki azalma ilə birlikdə fyuçers bazarında genişmiqyaslı likvidasiyalar baş verib. Məlumata görə, son 24 saat ərzində 300.000-dən çox investor likvidasiya olunub və ümumi zərər 1,09 mlrd. dollara çatıb. Ən böyük fərdi likvidasiya əməliyyatı "Bitfinex" birjasında 13,4 mln. dollar dəyərində qeydə alınıb.
Altkoin bazarında da ciddi itkilər yaşanıb. "ETH" 10% dəyər itirərək 2.000 dollar səviyyəsinə enib, "SOL" və "ADA" isə 15%-dən çox ucuzlaşıb. "XRP" də 10%-dən çox dəyər itirib. Kriptovalyuta bazarındakı bu kəskin satış dalğası fond bazarlarına da təsir edib və "Nasdaq 100" indeksi 2%-dən çox azalaraq eniş tendensiyasını davam etdirib.
Piter Brand: "Bu dalğalanma fürsət də ola bilər, tələ də"
Bütün bu hadisələr fonunda təcrübəli treyder Piter Brandt bazardakı dəyişkənliklə bağlı fikirlərini bölüşüb. O bildirib ki, "ötən həftəki dəyişkənlik həm böyük qazanc əldə etmək, həm də ciddi itkilərlə üzləşmək imkanı yaradıb. Lakin belə bir bazar, risk idarəçiliyini düzgün qurmayanlar üçün tələ ola bilər".
Brandın bu qiymətləndirməsi kriptovalyuta bazarındakı dalğalanmaların yüksək gəlir potensialı yaratdığı qədər böyük zərərlərə də səbəb ola biləcəyinə işarə edir.
"Bitcoin" və altkoinlər üçün növbəti addım nə olacaq?
Kripto analitikləri bazarın qarşıdakı günlərdə ABŞ-dən gələcək iqtisadi məlumatları və Ağ Evdə planlaşdırılan "Kripto Sammiti"ni diqqətlə izləyəcəyini bildirirlər. Həftə ərzində açıqlanacaq ABŞ-nin kənd təsərrüfatı sektorundan kənar məşğulluq göstəriciləri və "FED"in faiz siyasətinə dair ipucları bazarın qısamüddətli istiqamətini müəyyən edə bilər.
"Fundstrat"ın baş analitiki Tom Li bazarın yaxın zamanda dib səviyyəyə çata biləcəyini və bu həftədən etibarən bərpa prosesinin başlaya biləcəyini irəli sürüb. Digər tərəfdən, "BitMEX"in sabiq baş direktoru Artur Heys "Bitcoin"in 70.000 dollara qədər enə biləcəyi barədə xəbərdarlıq edib.
Kriptovalyuta bazarının qarşıdakı günlərdə necə hərəkət edəcəyi bütün diqqətlərin ABŞ-nin iqtisadi siyasətinə və kriptovalyutalarla bağlı veriləcək rəsmi açıqlamalara yönəlməsinə səbəb olacaq.
Diqqət! Bu yazı yatırım tövsiyəsi deyil. Məqalədə qiymətlər və dəyişikliklər ABŞ dolları ilə göstərilmişdir. Unutmayın ki, kriptovalyuta bazarı yüksək dəyişkənliyə malikdir və qiymətlər tez-tez dəyişir. Ən son məlumatlar üçün etibarlı mənbələrdən istifadə etməyiniz tövsiyə olunur.
Rəhim
