Ermənistanın baş naziri Nikol Paşinyanın yazılarının və eskalasiya qorxusunun aşılanmasının bir məqsədi var: dəhlizi açmasaq, cəmiyyəti Azərbaycanın müharibəyə başlayacağına inandırmaq.
Herbiand.az bildirir ki, bu barədə Ermənistanın “Hraparak” qəzeti yazıb.
“Nikol Paşinyan son bir ayda “Armenpress” vasitəsilə ikinci məqaləsini dərc edərək ictimaiyyəti növbəti dəfə sətirlər arasında eskalasiya ilə hədələyib. İlk məqalə fevralın 9-da dərc olunub. Bu dəfə o, kommunikasiyaların blokadadan çıxarılması ilə bağlı təkliflərini təqdim edir və qeyd edir ki, blokadanın açılması məsələsi mahiyyətcə həll olunub, lakin Azərbaycan bununla razılaşmır. O, Bakının Ermənistanın təkliflərini niyə rədd etdiyini soruşur. “Ümid edirəm ki, bu, eskalasiya üçün saxta bəhanə yaratmaq deyil”. Məqalədən aydın olur ki, Bakı Paşinyandan 9 noyabr 2020-ci il tarixli bəyanatının 9-cu bəndini həyata keçirməsi mümkün olmayan “Sülhün kəsişməsi” proqramından əl çəkməsini tələb edir. Bu bənddə isə deyilir ki, Bakıya veriləcək yol maneəsiz olmalıdır. “Regiondakı bütün iqtisadi və nəqliyyat əlaqələri blokdan çıxarılacaq. Ermənistan Respublikası vətəndaşların, nəqliyyat vasitələrinin və yüklərin hər iki istiqamətdə maneəsiz hərəkətini təşkil etmək məqsədilə Azərbaycan Respublikasının qərb rayonları ilə Naxçıvan Muxtar Respublikası arasında nəqliyyat rabitəsinin təhlükəsizliyinə təminat verir. Nəqliyyat rabitəsinə nəzarəti Rusiya FTX-nin Sərhəd Xidməti həyata keçirir”. Ancaq Laçın dəhlizi mövcud olduğu müddətdə bu məsələ müzakirə oluna bilərdi və Azərbaycan 9 noyabr bəyanatının qalan bəndlərini, o cümlədən məhbusların qaytarılmasını həyata keçirəcəkdi. İndi belə çıxır ki, Paşinyan həm Dağlıq Qarabağı (keçmiş – red.), həm də Laçını verib, Kirants ərazilərindən də imtina edib, məhbusları qaytara bilmir, amma dəhlizdən əl çəkməyə hazırdır”, - nəşr qeyd edir.
Bəxtiyar CƏFƏRLİ
