Azərbaycan İnvestisiya Holdinqinin idarəetməsindəki "Azəralüminium" MMC 2023-cü ili 3 milyon 76 min manat xalis mənfəətlə başa vurub.
Şirkətin maliyyə hesabatına görə, bu, 2022-ci illə müqayisədə 9 dəfə azdır.
2023-cü ildə “Azəralüminium”un satışdan gəlirləri 247 milyon 373 min manat (2022-ci ilə nisbətən 13,7 % az), satışının maya dəyəri 235 milyon 720 min manat (1,5 % çox), ümumi və inzibati xərcləri 5 milyon 701 min manat (3,1 % çox), satış və paylanma xərcləri 5 milyon 896 min manat (52,7 % az), gözlənilən kredit zərərləri üzrə ehtiyatların bərpasından gəliriləri 1 milyon 199 min manat (əvvəlki il zərər olub), digər gəlirləri 2 milyon 934 min manat (2,4 dəfə çox), mənfəət vergisi ödəmələri isə 1 milyon 114 min manat (6,3 dəfə az) təşkil edib.
2024-cü il yanvarın 1-nə “Azəralüminium”un aktivləri 367 milyon 12 min manat olub ki, bu da, illik müqayisədə 0,4 % çoxdur. Hesabat dövründə şirkətin öhdəlikləri 0,3 % azalaraq 23 milyon 883 min manata, balans kapitalı isə 0,5 % artaraq 343 milyon 236 milyon manata çatıb.
Xatırladaq ki, “Azəralüminium” 2018-ci ildə yaradılıb, onun nizamnamə kapitalı isə 282 milyon 244 min manatdır. Ölkədə əlvan metallurgiya sənayesinin aparıcı sahəsi olan boksit və alunit filizindən alüminium – oksid, ilkin alüminium və yarımfabrikat məhsullarının istehsalı üzrə aparıcı şirkətdir. Onun istehsal sahəsi Gəncə Alüminium Kompleksidir.
Prezident İlham Əliyevin 27 dekabr 2024-cü il tarixli sərəncamı ilə “Azərbaycan Sənaye Korporasiyası” ASC ləğv edilib, “Azəralüminium” isə Azərbaycan İnvestisiya Holdinqinin idarəetməsinə verilib.
© “Report”
