Qadınlar maliyyənin gələcəyini formalaşdırmaqda mühüm rol oynayır.
"Report" xəbər verir ki, bunu Milli Depozit Mərkəzinin (MDM) İdarə Heyəti sədrinin müavini Rəna İsgəndərova qarşıdan gələn 8 mart - Beynəlxalq Qadınlar Günü münasibəti ilə Bakıda keçirilən "Ring the Bell for gender equality" ("Gender bərabərliyi üçün zəngi çalın") adlı tədbirdə bildirib.
"Azərbaycan daxil olmaqla, bütün dünyada qadınlar maneələri aşaraq uğurun cinslə deyil, istedad, qətiyyət və yeniliklə müəyyən olunduğunu sübut edirlər. Maliyyə analitikləri və treyderlərdən tutmuş baş icraçı direktorlara və investorlara qədər qadınlar maliyyənin gələcəyini formalaşdırmaqda mühüm rol oynayırlar. Lakin biz bilirik ki, hələ görüləsi işlər var. Azərbaycan qadınları olaraq, ölkəmizin qadın hüquqları ilə bağlı diqqətəlayiq bir tarixə malik olduğunu xatırlamalıyıq. Azərbaycan 1918-ci ildə, bir çox başqa ölkələrdən xeyli əvvəl, qadınlara səs vermək və seçilmək hüququ verən dünyada ilk ölkə olub. Bu tarixi nailiyyət əldə etdiyimiz tərəqqinin sübutudur, liderlik və uzaqgörənliyin ruhlandırıcı nümunəsi kimi xidmət edir", - deyə o qeyd edib.
MDM rəsmisi həmçinin deyib: "Biz müxtəlifliyə, bərabərliyə və inklüzivliyə dəstək verməyə davam etməliyik, qadınların hər səviyyədə, xüsusən də kapital bazarında çiçəklənmək imkanına malik olmasını təmin etməliyik. Bu gün təkcə keçmiş nailiyyətlər qeyd edilməli deyil, həm də hərəkətə çağırış olmalıdır. Biz maliyyədə qadınları gücləndirdiyimiz zaman, bütün icmaları və iqtisadiyyatları gücləndiririk. İrəlilədikcə, gəlin bir-birimizə dəstək verməyə, biliklərimizi bölüşməyə və gələcək qadın nəslini kapital bazarlarında liderlik etmək, yenilik etmək və uğur qazanmaq üçün ruhlandırmağa davam edək".
