“Tərəflərdən birinin xarici ölkəyə köçməsi onu qarşı tərəfə aliment ödəməsindən azad etmir”.
Bu sözləri "Yeni Sabah"a hüquqşünas Ramil Süleymanov bildirib.
O əlavə edib ki, alimentlə bağlı qətnamə dövlətin adından çıxarılmış rəsmi sənəddir və icrası icbaridir:
“Tərəflərdən arasında boşanma olarsa və tərəflərdən biri xarici ölkəyə köçərsə, məhkəmə qətnaməsinin icrası heç bir halda ləngimir və dayanmır. Uşaqları özündə saxlayan tərəfə qarşı tərəfin aliment ödəməsi labüddür. Çünki bu qətnamə dövlətin adından çıxarılmış rəsmi sənəddir və icrası məcburidir”.
Ramil Süleymanov diqqətə çatdırıb ki, aliment ödəyən şəxs xarici ölkə vətəndaşlığına keçsə, iş bir az çətinləşir:
“İncə məqam ondan ibarətdir ki, şəxs xarici ölkəyə köçüb, xarici ölkə vətəndaşlığını qəbul edib, yeni ad-soyad götürəcəyi halda, iş dolaşır. Bununla bağlı həmin qətnamənin həmin xarici ölkədə tanıdılması tələb olunur".
Hüquqşünas daha bir ciddi xatırlatma edib: "Alimentin ödənilməsi zamanı yeni uşaqlar doğularsa, bununla bağlı aliment yenidən hesablanır. Əgər tərəflərdən biri xaricə köçübsəa, onun keçmiş ərinə, yaxud arvadına aliment ödəmək öhdəliyi olarsa, bununla bağlı həmin qətnamənin də icrası məcburidir”.
Nazim Hacıyev
Telegram kanalımız
