Qırğızıstan və Tacikistan sərhəddəki mübahisəli əraziləri delimitasiya prosesi çərçivəsində mübadilə ediblər. Bu barədə Qırğız Respublikasının Prezidenti Sadır Japarov “Kabar” dövlət xəbər agentliyinə müsahibəsində danışıb.
Japarovun sözlərinə görə, hər iki tərəf torpaq mübadiləsində heç bir strateji məqsəd güdməyib. Yalnız münaqişələrin daim yarandığı ərazilər dəyişdirildi. Onun sözlərinə görə, bu ərazilər ya anklavlardır, ya da sərhəddə dama taxtası naxışı kimi yerləşir.
“Sərhəd əbədi olaraq həll olunur. Budur, məsələ qoyulub, hər iki tərəfin maraqları nəzərə alınıb”, - Qırğızıstan lideri bildirib.
Qırğızıstanla Tacikistan arasında dövlət sərhədinin uzunluğu təqribən 980 km-dir. 2002-ci ilin dekabrından delimitasiya, yəni sərhədin dəqiq müəyyənləşdirilməsi və xəritədə çəkilməsi ilə bağlı danışıqlar davam edir.
Sərhəd probleminin həll olunmaması səbəbindən yerli sakinlərlə iki ölkənin hərbçiləri arasında, o cümlədən odlu silahdan istifadə ilə münaqişələr baş verib. Bu problemin həll edilməməsi dəfələrlə yerli sakinlər və hər iki ölkənin hərbi qulluqçularının iştirakı ilə münaqişələrə səbəb olub.
Dekabrın 4-də Qırğızıstan və Tacikistan sərhədin ümumi hissəsinin təsvirini tamamlayıb. Ölkələrin nümayəndələrinin görüşü Qırğızıstanın Batken şəhərində baş tutub. Qırğızıstan Nazirlər Kabineti tədbirin “dostluq və qarşılıqlı anlaşma şəraitində” keçdiyini qeyd edib.
Almaz Həsənli
