Ağ Evin süni intellekt və kriptovalyutası çarı David Sacks, "X" sosial media hesabındakı paylaşımında Trampın Strateji Bitkoin Ehtiyatı və Rəqəmsal Aktiv Səhmləri yaratmaq vədini yerinə yetirdiyini bildirib.
"Operativ Media" xəbər verir ki, ABŞ prezidenti Trampın Strateji Bitkoin Ehtiyatının yaradılması ilə bağlı fərmanı imzaladığını bildirən Sacks, “Bu fərman Prezident Trampın ABŞ-ı “dünyanın kriptovalyuta paytaxtı” etmək əzmini nümayiş etdirir” deyə bildirib.
Sacks sözügedən ehtiyatın federal hökumət tərəfindən saxlanılan və müsadirə edilən bitkoinlərlə yaradılacağını və bunun vergi ödəyicilərinə heç bir əlavə xərc çəkməyəcəyini deyib.
ABŞ hökumətinin təxminən 200 min bitkoininin olduğunun təxmin edildiyini vurğulayan Sacks, bununla belə, bu günə qədər hərtərəfli bir yoxlama aparılmadığını və fərmanın federal hökumətin rəqəmsal aktivlərinin tam uçotunun da nəzərdə tutulduğunu qeyd edib.
Sacks, ABŞ-nin ehtiyata yatırılan Bitkoinləri satmayacağını bildirib:
"Bitkoinin erkən satışı artıq ABŞ vergi ödəyicilərinə 17 milyard dollardan çox zərər vurdu. İndi federal hökumətin aktivlərinin dəyərini maksimuma çatdırmaq üçün strategiyası olacaq".
Sacks həmçinin qeyd edib ki, Xəzinədarlıq və Ticarət katiblərinə əlavə vergi yükü yaratmadan daha çox Bitkoin əldə etmək üçün büdcədən asılı olmayan strategiyalar hazırlamaq səlahiyyəti verilib.
