ABŞ-nin vitse-prezidenti J.D.Vansın Ukrayna ilə bağlı mövqeyi prezident Donald Trampdan daha sərtdir.
"Unikal" xəbər verir ki, bu barədə "Bloomberg" nəşri məlumat yayıb.
Tramp və Ukrayna prezidenti Volodimir Zelenski arasındakı fikir ayrılıqlarını aradan qaldırmaq və onlara təklif olunan mədən sazişini imzalamaq üçün danışıqlarla tanış olan avropalı rəsmilər bildiriblər ki, Vans “çox vaxt prezidentdən daha sərt mövqe tutur”.
Onun yanaşması həmçinin dövlət katibi Marko Rubio, milli təhlükəsizlik müşaviri Mayk Vals və Ukrayna üzrə xüsusi nümayəndə Keyt Kelloqun “daha mülayim” mövqeləri ilə ziddiyyət təşkil edir.
Agentlik qeyd edir ki, ABŞ vitse-prezidenti ilə təkbətək görüşən bəzi avropalı rəsmilər onun ünsiyyətlərini peşəkar və ictimai çıxışlarından daha az siyasiləşmiş kimi xarakterizə ediblər.
