"Azərbaycan banklarının bu il avrobond buraxmaq ehtimalı çox azdır".
Bu barədə “Fitch Ratings” beynəlxalq reytinq agentliyinin proqnozunda bildirilib. Reytinq agentliyi ümumilikdə bu amili digər Cənubi Qafqaz ölkələri- Ermənistan və Gürcüstana da şamil edib.
Qeyd edilib ki, Azərbaycanın və Ermənistanın ən böyük banklarının kifayət qədər likvidliyə malik olduğu üçün borclanma ehtiyacı azdır: “Azərbaycanın Beynəlxalq Bankının (BB/Müsbət) kredit/depozit nisbəti xüsusilə aşağıdır – 62%. Həmçinin, ABB-nin 2024-cü ilin birinci yarısının sonuna maliyyələşdirmə xərcləri 1,9% olub. Ermənistanın “Ardshinbank”ının (BB-/Stabil) kredit/depozit nisbəti 2022-ci ildə Rusiyadan böyük depozit axını səbəbindən əhəmiyyətli dərəcədə yaxşılaşıb. 2021-ci ildə 141% olan bu göstərici 2024-cü ilin sonuna 77%-ə düşüb. Gürcüstana gəldikdə isə TBC Bank və Bank of Georgia (hər ikisi: BB/Mənfi) siyasi risklər səbəbindən investorların marağının azalması ilə üzləşə bilər. Bu risklər ölkənin BB reytinqinə mənfi təsir edir”.
"Fitch" ümumilikdə hesab edir ki, 2025-ci ildə MDB+ regionunda avrobond yerləşdirilməsi Qazaxıstan və Özbəkistan bankları hesabına rekord səviyyəyə çata bilər. “Avrobond buraxılışlarının əsasən yenidən maliyyələşdirmə ehtiyacları və əlverişli makroiqtisadi şərait hesabına artması gözlənilir. Lakin bu prosesə geosiyasi risklər təsir edə bilər”- “Fitch” əlavə edib.
© APA
