Kanarya Adaları Astrofizika İnstitutu (IAC) və La Laguna Universitetinin (ULL) alimləri Günəşə bənzər HD 20794 adlı ulduzun ətrafında fırlanan və yaşana bilən zonada yerləşən bir super planetinin mövcudluğunu təsdiqləyib.
Sfera.az "En Son Haber"ə istinadən xəbər verir ki, HD 20794 d adlanan bu yeni planetin kütləsi Yer kürəsindən altı dəfə böyükdür və ulduzunun ətrafında bir dövr etməsi 647 gün çəkir.
Bu müddət, Marsın Günəş ətrafında fırlanma müddətindən təxminən 40 gün daha qısadır. Planetin bu orbitdə yerləşməsi, onun səthində maye suyun mövcud ola biləcəyini göstərir ki, bu da həyat üçün əsas şərtlərdən biridir. Alimlər bildirirlər ki, Günəşə bənzər ulduzların yaşana bilən zonalarında planetlərin axtarışı, Yer kürəsindən kənarda həyat ehtimalını öyrənmək üçün mühüm addımdır.
HD 20794 d-nin yerləşdiyi sistemin Yerdən cəmi 20 işıq ili uzaqda olması isə bu planetin gələcəkdə daha ətraflı tədqiq edilməsinə imkan yaradır. Buna baxmayaraq, planetin yüksək kütləsi və eksantrik (elliptik) orbitə malik olması, onun Yerdən xeyli fərqli bir obyekt olduğunu göstərir. HD 20794 d, il ərzində ulduzuna olan məsafəsini xeyli dəyişir və yaşana bilən zonanın daxili və xarici sərhədləri arasında hərəkət edir. Bu isə planetdə temperatur dəyişikliklərinin kəskin ola biləcəyini göstərir.
Alimlər planetin atmosferini və səthini daha yaxından öyrənmək üçün gələcəkdə ELT teleskopu, eləcə də ESA və NASA-nın yeni kosmik missiyalarından istifadə etməyi planlaşdırırlar. Mütəxəssislər bildirirlər ki, HD 20794 d planetində həqiqətən həyat olub-olmadığını müəyyən etmək üçün hələ çox araşdırma aparmaq lazımdır.
Bəsti Rəfizadə
