Ukrayna və Polşa hökumətlərinin rəsmiləri silah və hərbi texnikanın birgə istehsalı və texniki xidmətini müzakirə ediblər.
“İki sahil” xəbər verir ki, bu barədə Ukrayna Müdafiə Nazirliyi məlumat yayıb.
Qeyd edilib ki, danışıqlar “Polşa-Ukrayna hərbi əməkdaşlığı: ənənələr və perspektivlər” adlı konfrans çərçivəsində baş tutub.
Müdafiə nazirinin birinci müavini, general-leytenant İvan Qavrilyuk bildirib ki, Polşa Ukraynanın Rusiya təcavüzünə qarşı mübarizəsində etibarlı tərəfdaş olaraq qalır.
O qeyd edib ki, Polşa Ukraynaya Ümumi daxili məhsula (ÜDM) nisbətdə ən böyük dəstəyi (4,91%) - hərbi yardım və ukraynalı qaçqınlara yardım da daxil olmaqla verib.
İvan Qavrilyuk göstərdiyi davamlı dəstəyə və hərtərəfli köməyə görə Polşa hökumətinə və xalqına dərin minnətdarlığını bildirib: "Polşa Ukraynanı ağır silahlarla təchiz edən ilk ölkə oldu, tank koalisiyasının yaradılmasına təşəbbüs göstərdi və döyüş təyyarələrinin çatdırılmasına başladı. Bu gün Polşa Ukrayna Müdafiə Qüvvələrinin xüsusi ehtiyaclarını ödəmək üçün yaradılan "Bacarıq Koalisiyaları"nın əksəriyyətində iştirak edir", - Qavrilyuk bildirib.
Rusiyanın davamlı təhdidləri fonunda Polşa və Ukrayna birgə müdafiə qabiliyyətlərini artırmaq üçün hərbi əməkdaşlıq üçün yeni imkanları araşdıraraq regional həmrəyliyi gücləndirirlər.
Konfrans zamanı Ukrayna və Polşa hökumət rəsmiləri gələcək əməkdaşlığın əsas istiqamətlərini, o cümlədən silah və hərbi texnikanın birgə istehsalı, Qərb istehsalı olan hərbi texnikaya texniki qulluq və təmir, hərbi təchizat və logistika sahəsində əməkdaşlığı müzakirə ediblər.
Məhərrəm Ağalaroğlu, “İki sahil”
