Uşaqlar Niderlandda keçirilən yarışda gözlədiyimizdən daha yaxşı döyüşdülər.
Bunu “Report”a açıqlamasında Azərbaycanın yeniyetmələrdən ibarət taekvondo millisinin baş məşqçisi Səbuhi Zülfüqarov Niderlandda keçirilən 52-ci açıq çempionatda qazanılan nəticələrlə bağlı fikirlərini bildirərkən deyib.
Mütəxəssis əvvəlki yarışlarla müqayisə aparıb:
“Qatıldığımız ikinci yarışdır. Açığı, yeniyetmələrdən belə nəticə gözləmirdim. Çünki BƏƏ-dəki yarışda 1-i qızıl olmaqla 6 medal qazanmışdıq. Ona görə də Niderlandda daha çox qızıl medal gözləyirdik. Uşaqlar gözlədiyimizdən daha yaxşı döyüşdülər. İlk yarışla müqayisə etsək, çox yaxşı nəticədir”.
O, heyətdə nəsil dəyişikliyi olduğunu vurğulayıb:
“Komanda təcrübəsizdir, çünki cəmi ikinci dəfədir beynəlxalq yarışa qatılır. Həm də bu il yeniyetmələrdə nəsil dəyişikliyi olub, keçənilki heyətdən heç kim qalmayıb. Hamısı bu ildən etibarən gənclərdən ibarət komandada çıxış edirlər. Yeni nəsil olduğuna görə bu nəticəni çox bəyəndim. Düzdür, uşaqlarda təcrübəsizlik, texniki-taktiki səhvlər var. Səhvləri düzəltməyə və daha yaxşı nəticələr göstərməyə çalışacağıq”.
S.Zülfüqarov martın 15-də Belçikanın Lommel şəhərində keçiriləcək açıq çempionatla bağlı gözləntilərini bölüşüb:
“Belçikadakı yarışla bağlı bir söz demək çətindir. Çünki o da çox yaxşı turnirdir. Ümid edirəm ki, yüksək nəticələr göstərərik. Medal sayında fərq ola bilər, amma inanıram ki, uşaqlar Niderlanddakından daha yaxşı döyüşəcəklər”.
Qeyd edək ki, Azərbaycanın yeniyetmə taekvondoçuları Niderlandda keçirilən 52-ci açıq çempionatda 5 qızıl, 5 gümüş və 6 bürünc medal qazanıb.
