Novruzun gəlişi ilə təbiət yenidən canlanır, insanlar isə uzun qış mövsümünün yorğunluğunu atmaq üçün şəhərin səs-küyündən uzaqlaşmağa can atırlar. Bayram ərəfəsində qeyri-iş günlərinin ardıcıl olması isə bu istəyi daha da gücləndirir. Bəs paytaxt sakinlərinin istirahət üçün üz tutduğu regionlarda hotellər necə, qiymətlərdə artım varmı?
Mövzu ilə bağlı Demokratikmusavat.com -a danışan Restoranlar və Otellər Assosiasiyasının rəhbəri Samir Dübəndi bildirib ki, hər il olduğu kimi və ənənəvi uzun sürən istirahət günlərində insanlar, xüsusən şəhər sakinləri əyalətə, təbiət guşələrinə üz tutaraq öz istirahətlərini planlayırlar.
Onun sözlərinə görə, hazırda regional beş ulduzlu hotellərin bəziləri istirahət günlərinə artıq satışlarını saxlayıblar:
“Bu o deməkdir ki, bu kimi xidmətlərə tələbat təklifləri üstəliyib. Digər yerləşdirmə vasitələrində, kiçik kateqoriyalı hotellər, kotteclər, istirahət mərkəzləri, A-frame və sair təkliflərdə müxtəlif təlabatı müşahidə edirik və müxtəlif qiymətlər təklif edilirlər. Bəzi regionlar, maqistral yolun çəkilməsilə əlaqədar olaraq geridə qalırlar, yəni həmin rayonlara tələbat düşüb. Beş ulduzlu hotellərin qiymət təklifləri 2 nəfərlik otaq üçün 275-450 manat arası dəyişir.
Turizm fəaliyyətlərinə qatılmaq arzusunda olan əhaliyə öncədən səfərlərini planlamaqlarını tövsiyyə edərdim. Bu halda həm daha geniş çeşidli təkliflər, həm də müxtəlif qiymətlər seçimi olur”.
Şahnaz
