Rusiya Krasnodar diyarı pilotsuz təyyarələrin hücumuna məruz qalıb. PUA qalıqlarının düşməsi nəticəsində Tuapse Neft Emalı Zavodunda genişmiqyaslı yanğın başlayıb.
Yerli sakinlər sosial şəbəkələrdə yazıblar ki, səhər saat 3-də havada uçan bir neçə pilotsuz təyyarənin səsini eşidiblər. Yeddiyə yaxın partlayış olub. Bundan sonra neft bazasının ərazisində yanğın başlayıb. Hadisədən sonra yerli sakinlərin verdiyi məlumata görə, şəhərdə sirenlər səslənməyə başlayıb.
Daha sonra Tuapse bələdiyyə dairəsinin rəhbəri Sergey Boyko neft emalı zavodunda baş verən yanğın faktını təsdiqləyib. Yanğının sahəsi 1 min kvadratmetrdən çoxdur. Yanğının yaxınlıqdakı tanklara keçmə potensialının olduğu bildirilir. Yerli sakinlər əvvəllər neft emalı zavodunun “təsir çox güclü olduğu” üçün dron deyil, raketlə hücuma məruz qala biləcəyini irəli sürmüşdülər.
Bundan əlavə, Moskva vilayətinin sakinləri partlayışlar barədə məlumat veriblər. Moskva meri Sergey Sobyanin bildirib ki, gecə saatlarında hava hücumundan müdafiə qüvvələri Moskvaya doğru uçan dörd pilotsuz təyyarənin hücumunu dəf edib. Dağıntıların bir hissəsi Moskvadakı evlərin üzərinə, bir hissəsi isə Balaşixaya düşüb.
//Samir Qurbanov, Editor.az
