Tramp administrasiyası “Amerikanın səsi” və “Azad Avropa və Asiya” radiolarının maliyyəsini irimiqyaslı ixtisar edir, demək olar ki, bütün işçilər ödənişli məzuniyyətə buraxılır.
Trampın ixtisar tələb edən sərəncamı Amerikanın Səsi, Azad Avropa və Asiya və Radio Marti radiolarına, eləcə də Vudro Vilson Beynəlxalq Alimlər Mərkəzi, ABŞ-ın Evsizlər üzrə İdarələrarası Şurası və İcma İnkişafı Maliyyə Təşkilatları Fondu kimi bir sıra daha az tanınan dövlət qurumlarına aiddir.
Amerikanın Səsinin direktoru Mayk Abramowitz bildirib ki, onun 1300 nəfərdən ibarət demək olar ki, bütün heyəti ödənişli məzuniyyətə buraxılıb. BBC xəbər verir ki, işçilər ABŞ Qlobal Media Agentliyinin (USAGM) insan resursları departamentindən e-poçt bildirişi alıblar ki, onların federal maliyyələşdirilməsi dayandırılıb.
USAGM həmçinin Azadlıq Radiosuna qrantların dayandırılması barədə bildirişlər göndərib. Məktubda işçilərin inzibati məzuniyyətə göndərildiyi və "sonrakı xəbərdarlığa qədər" maaş və müavinətlər almağa davam edəcəyi bildirilib, LiveNOW Fox xəbər verir.
Çexiyanın xarici işlər naziri Yan Lipavski Avropa İttifaqının Praqada Azad Avropa Radiosunun işini qoruyub saxlamağa kömək edə biləcəyinə ümid etdiyini bildirib. O, mətbuatın fəaliyyətini qismən davam etdirmək üçün Avropa ölkələrinin xarici işlər nazirlərinə müraciət edəcəyini açıqlayıb.
Milyarder və Trampın ABŞ hökumətinin xərclərinin külli miqdarda azaldılmasına nəzarət edən baş müşaviri Elon Mask sosial media platforması X vasitəsilə Amerikanın Səsi radiostansiyasının bağlanmasına çağırış edib.
Daha əvvəl bildirilmişdi ki, Tramp Azadlıq Radiosu və Amerikanın Səsinə nəzarət edən USAGM daxil olmaqla, yeddi federal agentlikdə ixtisarlara göstəriş verib.
