Beynəlxalq Atom Enerjisi Agentliyi (MAQATE) İsrailin İrana endirdiyi zərbənin İslam Respublikasının nüvə obyektlərinə zərər vermədiyini bildirib.
NOCOMMENT.az xəbər verir ki, bu barədə TASS MAQATE-nin hesabatına istinadən məlumat yayıb.
“MAQATE İranın nüvə obyektlərinə heç bir zərərin olmadığını təsdiq edə bilər”, – deyə agentliyin açıqlamasında bildirilir.
Bundan başqa, agentliyin direktoru Rafael Qrossi münaqişə tərəflərini həddindən artıq təmkinli olmağa çağırıb və nüvə obyektlərinin hədəfə alınmamalı olduğunu vurğulayıb.
Aprelin 19-da məlum olub ki, İrandakı obyekt İsrail tərəfindən raket hücumuna məruz qalıb. Hücum İran hakimiyyətinin BMT-nin baş katibi Antonio Quterreşə göndərdiyi mesajda İslam Respublikasının İsraillə münaqişəni qızışdırmaq istəmədiyini, lakin yəhudi dövlətinin təcavüzkarlıq nümayiş etdirdiyi təqdirdə güclü cavab alacağını bildirməsindən bir neçə saat sonra baş verib. .