Çinin lideri ilə Blinken arasında görüş gərgin keçib

Bakı, 26 aprel, AZƏRTAC

Pekində səfərdə olan ABŞ-ın dövlət katibi Antoni Blinken ilə Cin Xalq Respublikasının Sədri Si Cinpin arasında görüş gərgin keçib.

AZƏRTAC NBS telekanalına istinadla xəbər verir ki, Çinin lideri iki ölkə arasında münasibətlərdə mənfi tendensiyanın davam etdiyini və bunun bütün dünya üçün arzuolunmaz nəticələrə gətirib çıxaracağını bildirib.

Blinken Çin liderinə bildirib ki, Prezident Co Bayden onu Çinə “əməkdaşlıq sahələrini dərinləşdirməyə, eləcə də mövcud fikir ayrılıqlarını məsuliyyətlə idarə etməyə” göndərib. O qeyd edib ki, bu il ABŞ ilə Çin arasında diplomatik əlaqələrin qurulmasının 45-ci ildönümüdür və iki ölkə “düşmən deyil, tərəfdaş olmalıdır”.

Antoni Blinkenlə daha əvvəl görüşən çinli həmkarı Van Yi isə deyib: “Dünya həm Çinin, həm də ABŞ-ın eyni vaxtda inkişafı və rifahı təmin etmək üçün kifayət qədər böyükdür. Vaşinqtonun pozitiv və konstruktiv mövqe tutması ABŞ-Çin münasibətlərini sabitləşdirəcək”.

Bu, Blinkenin bir ildən az müddətdə Çinə ikinci səfəridir, çünki iki fövqəldövlət artan geosiyasi fikir ayrılıqlarına baxmayaraq, yenilənmiş danışıqlarla əlaqələri sabitləşdirməyə çalışır.

Blinkenin Çinə səfərinin əsas məqsədi Moskva və Pekinin 2022-ci ildə “məhdudiyyətsiz” tərəfdaşlıq elan etməsindən həftələr sonra başlayan Ukraynaya qarşı Rusiyanın müharibəsi ilə bağlı fikir mübadiləsi aparmaq və qarşı tərəfin mövqeyini dəqiqləşdirməkdir. Amma Pekin Moskvaya hərbi yardım göstərmədiyini iddia edir. Blinken isə keçən həftə dəzgahlar, yarımkeçiricilər və Rusiyanın müdafiə sənayesi bazasına töhfə verən digər ikili təyinatlı texnologiyalarla bağlı narahatlığını ifadə etmişdi.