Klub rəhbəri şəhərinin iş adamlarına səsləndi - AÇIQLAMA

I Liqanın 23-cü turunda doğma meydanda “Zaqatala”nı 2:1 hesabı ilə məğlub edən “İmişli” turnir cədvəlinin 2-ci pilləsində qərarlaşıb.

Əgər AFFA Premyer Liqada komandaların sayını artırsa, “çəhrayı pələnglər” yüksək dəstədə iştirak edə biləcək potensialdadır.

Xəbər verdiyimiz kimi, klub artıq bu istiqamətdə işlərə başlayıb. Heydər Əliyev adına “İmişli” şəhər stadionunda mövsüm bitən kimi bərpa işləri başlanacaq.

Bilirsiniz ki, RDC şirkəti klubun yeganə mailiyyə dəstəyidir. Kollektiv Premyer Liqaya vəsiqə qazansa, büdcəsi normal komanda formalışdırmağa bəs edəcək? Sualımızı “İmişli”nin İdarə Heyətinin sədri Aqşin Mürsəlova ünvanladıq. Klub rəsmisi Offsideplus.az-a məsələ ilə bağlı bunları dedi:

“FİF-in dəstəyi ilə komandamıza "RDC Group" şirkəti 31.06.2024-ci il tarixinə qədər baş sponsor olaraq cəlb edilib. Premyer Liqaya çıxdıqdan sonra kompaniya ilə müqaviləni yeniləyəcəyimizi düşünürük. Əlavə olaraq, "DaşlI Bulaq" su sponsoru kimi cəlb edilib.
Marketinq işlərimiz davam edir. Kluba həm əlavə sponsor, həm də əlavə gəlir cəlb olunması ilə bağlı işçi heyətimiz çalışır”.

Aqşin bəy İmişlidən olan iş adamlarına da səsləndi:

“Şəhərimizi ölkə səviyyəsində tanınan biznes və iş adamları ilə görüşlər planlaşdırmışıq. Bizə dəstək olacaqlarına inanırıq. Bu vaxta kimi heç bir şəxs və ya şirkət nə dəstək olub, nə də hansısa təklif etməyib. “İmişli” yeganə I Liqa klubudur ki, çempionatın ilk günündən azarkeşləri bilet alaraq oyuna baxmağa gəlir. Sadə İmişli sakinlərinin, fanatlarımızın dəstəyi bizi Premyer Liqaya çıxmağa daha da həvəsləndirir.
Əsas liqada “İmişli”ni və mərkəz regionunu layiqli təmsil etmək üçün burada yaşayan hər kəsdən dəstək gözləyirik. Bütün təkliflərə açığıq”.

İradə Hatəmi