Kahramanmaraşdakı zəlzələ ilə bağlı məhkəmə İCLASI: "Badımcan sahəsində bina tikiblər"

6 fevral 2023-cü ildə baş verən və "Əsrin fəlakəti" olaraq xarakterizə edilən Kahramanmaraş mərkəzli zəlzələlərdə dağılan Ebrar Yaşayış Kompleksi Reyyan binasında 52 nəfərin ölümü ilə bağlı 4 şübhəlinin məhkəməsi davam edib.

BAKU.WS Türkiyə mediasına istinadən xəbər verir ki, həbsdə olan müttəhim Məsut Vahit Kazancı məhkəməyə həbsxanadan Audio və Video İnformasiya Sistemi (SEGBİS) vasitəsilə qatılıb.

Digər məhbus şübhəlilər Muhammet Karaaslan, Harun Gümüşer və şübhəli A. Nasuh ilə yanaşı, şikayətçilər və tərəflərin vəkilləri də olub.

Ekspertin ədalətli yanaşmadığını ifadə edən həbs olunan şübhəli Harun Gümüşer 25 ildir mühəndis olduğunu və Kahramanmaraşda çoxsaylı layihələr həyata keçirdiyini bildirib.

Həbsdə olan müttəhim Muhammet Karaaslan da əvvəlki ifadələrinin sabit qaldığını bildirib.

Kazancı isə 14 aydır həbsxanada olduğunu, ailəsi ilə birlikdə zəlzələnin çətinliyini hələ də yaşadığını, həm səhhəti, həm də ailəvi səbəblərə görə azadlığa buraxılmasını tələb etdiyini bildirib.

Şübhəlilərdən A. Nasuh isə binanın yalnız torpaq sahibi olduğunu və bina ilə bağlı heç bir kommersiya fəaliyyətinin olmadığını əsas gətirib.

Şikayətçilərdən Neslihan məsul şəxslərdən şikayətçi bildirib:

"Reyyan binasında çox sevdiyimiz insanları itirdik. Badımcan sahəsində bina tikiblər. Atamı qumun içindən çıxartdıq. Nədənsə ətrafdakı tikililərin heç biri dağılmadı. Eyni zəlzələnin intensivliyinə baxmayaraq, aralarında çox az məsafə olduğu halda, həmin ərazidə Reyyan binası uçub.Bütün məsul şəxslərdən şikayətçiyəm".

Məhkəmədə iştirak edən digər şikayətçilər təqsirləndirilən şəxslərdən şikayətlərinin olduğunu bildirib və onların cəzalandırılmasını istəyiblər.

Məhkəmə həbsdə olan təqsirləndirilən şəxslərin hazırkı vəziyyətinin davam etdirilməsinə qərar verib və iclası iyulun 5-nə təxirə salıb.