“Düşünürəm ki, ikinci yer də pis nəticə deyil”- Məhəmməd Muradlı

"Finala kimi hər şey qaydasındaydı. Yarımfinalda Vüqar Rəsulova qarşı ilk oyunda yaxşı oynamasam da, sonradan toparlanıb qalib gəlməyi bacardım. Finalda turnirin iki ən güclü şahmatçısı qarşılaşırdı. Burda kim qalib və ya məğlub olsaydı, təəccüb doğurmayacaqdı. Elə alındı ki, mən finalda Aydından daha çox səhv etdim. Təbii ki, bu da məğlubiyyətimə səbəb oldu. Turnir mənim üçün ümumilikdə normal keçdi. Çempion ola bilmədim deyə bir qədər kefim pozulsa da, nəticəni yaxşı qiymətləndirərdim. Reytinq əmsalımı artırdım və AÇ-yə vəsiqə qazandım. Düşünürəm ki, ikinci yer də pis nəticə deyil. Ölkə çempionatı ümumilikdə çətin turnirdi. Hər kəs bir-birini tanıyır. Buna görə də rəqibləri çaşdırmaq rahat olmur. Bu turnirin stressi başqalarından daha çox olur. Milli komandadakı şahmatçıların iştirak etməməsi mübarizənin gərginliyini azaldır. Onlar iştirak edərsə, daha gərgin və daha maraqlı olardı. Çoxları elə düşünür ki, biz onların iştirak etməməsinə sevinirik, belədə bizim üçün yer tutmaq daha rahat olur. Amma belə deyil. Şəxsən mən istəyərdim ki, milli komandanın üzvü olan bütün şahmatçılar ölkə çempionatında iştirak etsin. Gücümüzü sınayaq, uğurlu olmağa çalışaq".