Meymunlar şəhəri yerlə-yeksan etdi: Onların qarşısını almağa çağıran plakatları cırdı

Qəzəbli meymunlar dəstəsi Taylandda Lopburi turizm mərkəzində meymun işğalına qarşı şüarlar yazılmış 30 plakatı cırıb. Əvvəllər bu heyvanlara yemək və əyləncə axtarmaq üçün şəhər küçələrində sərbəst gəzməyə icazə verilirdisə, son vaxtlar onların aqressivliyi hallarına daha çox rast gəlinir. 

Sfera.az bildirir ki, Lopburidə "meymun turizmi" əhəmiyyətli gəlir mənbəyi kimi görülür. İnsanlar buraya şəkil çəkdirmək və meymunlarla oynamaq üçün gəlirlər.

Lopburi sakinləri hakimiyyət orqanlarını meymunların zülmünə son qoymağa çağıran plakatlar asıblar. İnsanlar Taylandın Milli Parklar Departamentindən "meymun turizmi" adlanan fəaliyyətin məhdudlaşdırılmasını, heyvanların tutularaq, yenidən vəhşi təbiətə buraxılmasını tələb edirlər.

Maraqlıdır ki, ertəsi gün 18:00 radələrində meymunların adətən yatmaq saatında əks etiraz aksiyası başlayıb: bir sürü heyvan küçəyə çıxıb, asılmış pankartları söküb dağıdıb.

Qeyd etdiyimiz kimi, Lopburi “meymun turizmini” əhəmiyyətli gəlir mənbəyi hesab edir. Noyabrın son bazar günü isə şəhər hətta illik Meymun Bufet Festivalına ev sahibliyi edir.

Bununla belə, son bir neçə ildə meymunların davranışı idarəolunmaz hala gəlib. İki il əvvəl, koronavirus pandemiyasının qızğın vaxtında ərazi və yemək uğrunda meymun döyüşləri kəndin mərkəzi hissəsinin viran qalmasına səbəb olub.

Turistlər karantin səbəbindən şəhərə gəlmədiklərindən, meymunlara yem verən də olmayıb. Öyrəşdikləri şəraitdən məhrum olan və yeməksiz qalan ac meymunlar şəhərin mərkəzində üsyan qaldırıblar.

İndi də küçələrə bir sürü heyvan çıxıb, asılmış plakatları cırıb dağıdıb.

Yerli hökumət rəsmiləri və hərbçilərin də daxil olduğu birgə işçi qrupu hazırda problem yaradanları tutmaq və sığınacaqlara köçürmək üçün çalışır. Bundan əlavə, qeyd etdiyimiz kimi, Tailandda meymunlarla mübarizə üçün xüsusi bölmə yaradılıb. 

Daha əvvəl də məlumat verdiyimiz kimi, bir sıra Asiya ölkələrində cinayətkarlar heyvanlara turistlərin telefonlarını oğurlamaq, həmçinin bankları soymaq üçün təlim keçərək, onlardan istifadə edir.

Aynil

Sfera.az