KİV: NATO Ukraynadakı münaqişəyə müdaxilə üçün iki qırmızı xətt qoyub

Şimali Atlantika Alyansı (NATO) özəl olaraq ən azı iki qırmızı xətt yaradıb ki, onların keçməsi blok ölkələrinin Ukraynadakı münaqişəyə cəlb olunmasına gətirib çıxaracaq. 

"Operativ Media" xəbər verir ki, bu barədə "La Repubblica" qəzeti yazır.

Qeyd edilir ki, NATO üçüncü ölkənin vəziyyətə müdaxilə edə biləcəyindən və Rusiya Federasiyasının bunun üçün təxribat törədə biləcəyindən ehtiyat edir.

Nəşr vurğulayır ki, söhbət alyansın Ukraynaya qoşun yeritmək üzrə əməliyyat planlarından getmir. Hələlik NATO nümayəndələri mümkün fəaliyyət planlarını "müharibəyə üçüncü tərəflərin cəlb olunacağı halda" son çarə kimi qiymətləndirirlər.

Qəzet birinci qırmızı xətt kimi Ukraynada baş verənlərə "üçüncü ölkənin birbaşa və ya dolayı müdaxiləsini" göstərir. Materialda deyilir ki, NATO bu halda Belarusun münaqişədə birbaşa iştirakının mümkünlüyünü istisna etmir. Nəşr qeyd edir ki, Rusiya ilə Ukrayna arasındakı sərhəd çox "geniş və həssasdır" və Ukrayna qoşunları ona tam nəzarət edə bilmir. NATO hesab edir ki, Rusiya Silahlı Qüvvələri şimal-qərbə doğru irəliləməyə qadirdir və bu, Kiyev və Belarus arasında dəhlizin yaradılması ilə nəticələnəcək.

Nəşr ikinci qırmızı xətti Polşaya və ya Baltikyanı ölkələrə qarşı guya mümkün hərbi təxribat, eləcə də Moldovaya qarşı hərbi əməliyyatlar hesab edir.