“Ulduz Müharibələri”nin qəhrəmanından Co Baydenə tərif

“Ulduz Müharibələri” serialında Luk Skiualker obrazını canlandıran Mark Hamill ABŞ prezidenti Co Baydeni dəstəklədiyini açıqlayıb.

Hafta.az-ın AFP-yə istinadən yazdığına görə, Hamill Ağ Evdə Baydenlə görüşüb. Elə həmin gün keçirilən mətbuat konfransında 72 yaşlı aktyor Bayden haqqında “O, bütün həyatımda qanunvericilik sahəsində gördüyüm ən uğurlu addımları atan liderdir” deyib.

Amerikalı aktyor ABŞ prezidenti ilə bağlı qapılar arxasında söhbəti ilə bağlı belə açıqlamalar verib: “Mən ona “cənab prezident” deyə müraciət etdim, o, “mənə Co deyə bilərsiniz” dedi.

1977-ci ildə "Ulduz Müharibələri: Epizod IV - Yeni Ümid" filmində Alek Quinnessin canlandırdığı Jedi ustası Obi-Van Kenobi Darf Vaderlə mübarizəsində Skiualkeri dəstəkləyib və ona xüsusi güclərindən necə istifadə etməyi öyrədib.

Baydenlə danışdıqları ilə bağlı təfərrüatları paylaşmayan Hamill, keçmiş ABŞ liderləri Cimmi Karter və Barak Obamanın dövründə də Ağ Evi ziyarət etdiyini, lakin Oval Ofisi ilk dəfə gördüyünü ifadə edərək, "Bu mənim üçün çox xüsusi idi” deyib.

Hamill taxdığı gün eynəyini Baydendən hədiyyə aldığını bildirib.

X-də 5 milyona yaxın izləyicisi olan aktyor tez-tez Baydenin rəqibi, ABŞ-ın keçmiş prezidenti Donald Trampı tənqid edir.

Tanınmış aktyorun səfəri mayın 4-də film seriyasının pərəstişkarlarının qeyd etdiyi “Ulduz Müharibələri” Gününə az qalmış baş tutub.

Digər tərəfdən, mətbuat konfransında bir jurnalist Hamillin Baydeni niyə ziyarət etdiyini soruşduqda, Ağ Evin sözçüsü Karine Jean-Pierre belə cavab verib: "Onun bura gəlməsi xoşunuza gəlmədi? Mark Hamill şəhərdə idi, bura gəldi. O, bu ölkənin istiqamətinə çox sadiq olan biridir".

Hollivud ulduzu Robert De Niro da cümə axşamı MSNBC-də yayımlanan müsahibəsində Baydeni dəstəklədiyini və Trampı "dəhşətli canavar" adlandırdığını bildirib.