İdman

ÖTƏN HƏFTƏNİN SİTATLARI

football-plus.az

23:02 07.05.2024

Smartbee
Şikayət et

Daha bir futbol həftəsini geridə qoyduq.

"Football-plus.az" ötən həftənin maraqlı sitatlarını təqdim edir:

Herbert Hayner, “Bavariya”nın prezidenti:

“Hazırda Ralfla fəal danışıqlar aparırıq. Lakin bir neçə gün daha gözləməliyik. Ranqnik əla futbol mütəxəssisidi. Hər şey yoluna düşsə, bu, baş məqşçi vəzifəsi üçün çox yaxşı seçim olacaq”.

Canluici Buffon, İtaliya yığmasının sabiq qapıçısı:

“Karyeramda hər hansı bir oyunu təkrar oynaya bilsəydim, bu, 2012-ci ildə İspaniyaya qarşı Avropa çempionatının finalı olardı. Biz məğlubiyyətə layiq deyildik (İtaliya Ukrayna və Polşada keçirilən turnirin son matçında İspaniyaya 0:4 hesabı ilə uduzub – R.Y.). Yorğun idik. Heç vaxt məğlubiyyətə bəhanə axtarmıram, amma həmin oyunu dözülməz psixofiziki şəraitdə keçirdik. Bizə bir gün də istirahət verilsəydi, başqa cür oynaya bilərdik. İspaniyaya qarşı heç nə edə bilmədik. Amma qrup mərhələsində onlara uduzmayan yeganə komanda biz idik”.

Robert Levandovski, “Barselona”nın hücumçusu:

“Bu yay “Barselona”dan ayrılmağım qətiyyən mümkün deyil. Bu, müzakirə mövzusu deyil. Fiziki cəhətdən özümü yaxşı hiss edirəm. Ən azı daha iki il də belə olacaq. Fiziki planda ən yüksək səviyyədə olmayanda getmək barədə düşünəcəyəm”.

Arne Slot, “Feyenoord”un baş məşqçisi:

“Liverpul” ilə danışıqlar aparılır, amma hələlik rəsmi olaraq heç nə təsdiqlənməyib. İndi sinəmdə “Feyenoord” emblemi var. Ona görə də yalnız “Feyenoord” haqqında danışmaq niyyətindəyəm. Bununla belə, klublar arasında razılığın əldə olunacağını gözləyirəm”.

Coui Barton, İngiltərə yığmasının sabiq yarımmüdafiəçisi:

“Mənim üçün Messi adı ilə yanaşı böyük ulduz işarəsi var. Ona görə ki, o, yeniyetmə yaşında boy probleminin həlli üçün steroidlər qəbul edib. Lionel gənc yaşlarında genetik cəhətdən modifikasiya olunub. Bu səbəbdən onu adının yanında böyük ulduz işarəsi qoyulmalıdı. Onun bədəninə boy hormonları yeridilib, argentinalı futbolçu bunların sayəsində hərtərəfli inkişafa nal olub. Lionelin boy atması təbii şəraitdə reallaşsaydı, futbolçu kimi son dərəcədə inkişaf tapmaz və saya-hesaba gəlməyən titul qazana bilməzdi”.

Joze Mourinyo, işsiz portuqaliyalı məşqçi:

“Məncə, bu il Avropa çempionatının qalibi üç komandadan biri – Portuqaliya, Fransa, ya da İngiltərə olacaq. Bəli, bu turnirlərdə hərdən sürprizlər də olur. Amma oyunçularının keyfiyyətinə görə Portuqaliyanın Almaniyada keçiriləcək turnirə çempionluq hədəfi ilə yollanacağını düşünürəm”.

Marko Roys, Dortmund “Borussiya”sının yarımmüdafiəçisi:

“Klubum “Borussiya”da keçirdiyim dövrlə fəxr edirəm. Burda ömrümün yarıdan çox hissəsini keçirmişəm. Hər günümə görə sevinmişəm, amma təbii ki, məyusedici anlarım da olub. Artıq yaxşı bilirəm ki, mövsümün sonunda komanda ilə vidalaşmaq mənim üçün çətin olacaq. Nəhayət, bu klubdakı karyeramla bağlı məsələyə rəsmən aydınlıq gəlməsinə sevinirəm. Başqa sözlə, mövsümün həlledici oyunlarına daha yaxşı halda köklənə biləcəyik. Bizim böyük hədəfimiz var (Çempionlar Liqasında qələbəni nəzərdə tutur – R.Y.) və onu həyata keçirməyi çox istəyirik”.

Xosep Qvardiola, “Mançester Siti”nin baş məşqçisi: “Mövsümün son 4 oyununda 12 xal qazanmalı olduğumuzu bilirik. Əks halda çempionluq hədəfinə çatmağımız çətin olacaq. Çünki “Arsenal” çox güclüdü. Amma hər şey öz əlimizdədi. Biz hər növbəti matçı qalib kimi başa vurmaq istəyirik. Bu, komandamız üçün çətin deyil. Ötən mövsümlərdə etdiklərimizi təkrarlamalı olduğumuzu demək istəyirəm. Uğurlu nəticələrə indi də köklənmişik”.

Yürgen Klopp, “Liverpul”un baş məşqçisi:

“Salah gələn mövsüm də “Liverpul”da oynayacaq? Bu, artıq mənim müzakirə edəcəyim mövzu deyil. Bu haqda danışmalı olduğumu düşünmürəm. Bu məsələni başqaları, ilk növbədə də Məhəmməd həll etməlidi. Yenə deyirəm, bu, mənlik deyil”.

Maurisio Poçettino, “Çelsi”nin baş məşqçisi:

“Bu qədər şayiə kifayətdi (KİV-ə müraciət edir – R.Y.). Müqaviləmin müddətinin sonuna bir il qalıbsa və rəhbərlik bu haqda heç nə danışmırsa, mən bu komandada qalacağımı hesab edirəm. Bu fikrim yalnız mövsümün sonunda bosslardan kimsə mənə “çao” deyəndə dəyişəcək. Ona görə ki, hazırkı məqamda mövzu ilə bağlı heç nə bilmirik. Buna görə “Çelsi”ni daha bir mövsüm çalışdıracağımı düşünürəm. Mənim burda qalıb-qalmayacağımı klubun başbilənlərindən soruşun, daha bilmədiyiniz məsələ ilə bağlı mənasız fikirlər səsləndirməyin”.

Dmitri Svişev, Rusiya Federasiyası Dövlət Dumasının fiziki hazırlıq və idman komitəsinin sədri:

“Məncə, Rusiya Futbol İttifaqının milli komandamızın 2028-ci ildə beynəlxalq yarışlara buraxılacağı ilə bağlı ümidi optimal sayılmalıdı. 2030-cu ilə təyin olunan dünya çempionatının seçmə turnirinin başlamasına 4 il qalmış her şey baş verə bilər. Mən komandalarımızın beynəlxalq turnirlərə qayıdışının daha tez olacağına ümid edirəm”.

Xerard Pike, “Barselona”nın sabiq müdafiəçisi:

“Arsenal”ın o vaxtkı çalışdırıcısı Arsen Venger məni və Lionel Messini komandasında görmək istəyirdi. İngiltərə klubu bizə görə “Barselona”ya təklif irəli sürmüşdü. Londonlular ilə danışıqprosesi çox çətin keçirdi. Belə məqamda “Mançester Yunayted” araya girib klubdan məni istədi. Mən də bu komandaya getməyə razılaşdım. Venger sonra Messini komandasına çəkməyə çalışdı, amma onun şansı yox idi”.

Lotar Matteus, Almaniya yığmasının sabiq müdafiəçisi:

“Azarkeşlərinin “Roma”nı irəli səsləyəcəyi gözlənilirdi. Leverkuzenlilər Lukakunun zərbəsindən bərk qorxuya düşdülər. Lakin bundan sonra meydanda baş verənlər onları çox da təlaşa salmadı. “Bayer-04” qalan vaxtda özünü əsl çempion kimi apardı (Almaniya klubu Avropa Liqasının Romada keçirilən ilk yarımfinal matçında 2:0 hesabı ilə qalib gəlib – R.Y.). Artıq söhbət ayrı-ayrı oyunlarda qazanılan qələbələrdən getmir. Xabi Alonsonun komandası dözümlü, soyuqqanlı və təmkinli göründü”.

Coui Barton, İngiltərə yığmasının sabiq yarımmüdafiəçisi:

“Messinin boy atması təbii şəraitdə reallaşsaydı, saya-hesaba gəlməyən titul qazana bilməzdi”.

Bütün xəbərləri reklamsız oxumaq üçün qeydiyyatdan keç və ya login ol. Günlük ölkədə baş verən xəbərləri bizdən izlə.

Seçilən