BMT-də süni intellektin inkişaf proseslərində rolu müzakirə edilib

Bakı, 8 may, AZƏRTAC

BMT-nin İqtisadi və Sosial Şurası (ECOSOC) “Dayanıqlı İnkişaf Məqsədlərinə (SDGs) nail olunmasında süni intellektin (AI) rolu” mövzusunda xüsusi iclas keçirib.

AZƏRTAC təşkilatın saytına istinadla xəbər verir ki, iclasın məqsədi mürəkkəb sosial problemləri həll etmək və Dayanıqlı İnkişaf Məqsədlərinə nail olmaq üçün AI texnologiyalarından istifadə yollarını araşdırmaq olub.

İclasda çıxış edən ekspertlər bildiriblər ki, Dayanıqlı İnkişaf Məqsədlərinə nail olmaq üçün süni intellekt texnologiyalarının etik və məsuliyyətli tətbiqinə rəhbərlik etməkdə idarəetmə çərçivələrinin rolunu araşdırmaq vacibidir.

Mütəxəssislər bu sahədə çətinlikləri və öyrənilmiş dərsləri vurğulayaraq, konkret SDG-ləri həll etmək üçün AI texnologiyalarından necə istifadə edildiyini göstərən real həyat nümunələrindən bəhs ediblər. İclasda vurğulanıb ki, davamlı inkişaf naminə süni intellektdən istifadə etmək üçün hökumətlər, beynəlxalq təşkilatlar, akademik dairələr, vətəndaş cəmiyyəti, özəl sektor, texniki standartlar təşkilatları və bu sahənin ekspertlərindən ibarət olan maraqlı tərəflər arasında bilik mübadiləsi, əməkdaşlıq və tərəfdaşlıq münasibətləri yaxşılaşdırılmalıdır.

Tədbirdə AI texnologiyalarından daha geniş istifadə üzrə təkliflər verilib, həmçinin hökumətlərin maliyyə dəstəyi ilə yeni nəzarətedici funksiyaları ehtiva edən proqramların həyata keçirilməsi ətrafında fikir mübadiləsi aparılıb.