3 güləşçimiz 1/4 finalda, 1-i uduzub

Bu gün güləş üzrə Dünya Olimpiya Təsnifat Turnirinə start verilib.

Offsideplus.az xəbər verir ki, Türkiyənin İstanbul şəhərindəki yarışın ilk günündə yunan-Roma güləşçiləri xalça üzərinə çıxacaq.

Azərbaycan millisinin 4 “klassik”i Paris-2024-ə son lisenziyalar üçün mübarizə aparacaq. Təmsilçilərimiz bunun üçün ilk üç yerdən birini tutmağa çalışacaq.

Yunan-Roma güləşi
60 kq
Murad Məmmədov təsnifat mərhələsində Aleksandrs Yurkyans (Latviya) ilə qarşılaşıb. O, 10:1 hesabı ilə qələbə qazanıb. Yığma üzvü 1/8 finalda Kristofer Kramerlə (Almaniya) münasibətinə aydınlıq gətirib. Məmmədov bu görüşdən də üstün ayrılıb - 10:1. Murad 1/4 finalda polşalı Mixal Tratsla güləşəcək.

87 kq
Rafiq Hüseynovun təsnifat mərhələsindəki rəqibi İlyas Paqkalidis (Yunanıstan) olub. Titullu güləşçimiz 3:1 hesabı ilə qalib gələrək, 1/8 finala yüksəlib. Hüseynov ikinci qarşılaşmasında hindistanlı Kumar Sunilə də gücünü göstərib - 4:3. İkiqat dünya çempionumuz növbəti sınağında Aleks Kessidislə (İsveç) üz-üzə gələcək.

97 kq
Təsnifat mərhələsindən yarışa başlayan Murad Əhmədiyev Riçard Karelsonu (Estoniya) sınağa çəkib. Sonuncu xal prinsipi ilə qələbə qazanan (1:1) Murad 1/8 finalda Yuri Nakazato (Yaponiya) ilə görüşüb və məğlubiyyətə üzülüb - 1:3.

130 kq
Sabah Şəriəti təsnifat mərhələsində Nikolaos Ntunyasa (Yunanıstan) qalib gəlib - 8:3. O, 1/8 finalda Roman Kimlə (Qırğızıstan) qüvvəsini sınayıb. Tam üstünlüklə (10:0) qalib gələn Olimpiya mükafatçısı 1/4 finala yüksəlib.

Qeyd edək ki, Azərbaycan millisi İstanbuldakı turnirədək sərbəst güləşdə 6, yunan-Roma güləşində 2 lisenziya qazanıb. Sabah qadın millimizin 5 güləşçisi xalça üzərinə çıxacaq.