Hər səhər paytaxtın mərkəzində yerləşən Nizami küçəsindəki kiçik köşkün qapısını öz əlləri ilə açır, axşamlar isə bağlayır. Köşkün hardasa 2 metr uzunluğu, 1 metrdən bir az eni var. Sol tərəfdə isə 2 kiçik lampa yanır. Düz 36 ildir ki, bu ünvandadır...
“Sən demə, xoşbəxt olmaq üçün geniş, dəbdəbəli saraylara, böyük iş otaqlarına ehtiyac yoxmuş. Mən 3–4 kavadratmetrlik iş otağımda, neçə ildən bəri yaşadığım mənzildə özümü çox xoşbəxt hiss edirəm”, – deyə Arif Ağatalıbov söhbət açır.
Əmək fəaliyyətinə isə daha əvvəl–1971-ci ildə başlayıb. 1967-ci ildə oxuduğu 39 nömrəli məktəbin 8-ci sinfini bitirəndən sonra 16 nömrəli texniki-peşə məktəbinə üz tutub. 3 il yarım çəkməçi peşəsinin incəliklərinə yiyələnib. Bir müddət “Dəb evi”ndə işləyib. Bir ildən sonra hərbi xidmətə gedib. Qayıdandan sonra yenə də sevimli peşəsi ilə məşğul olub. 54 ilə yaxındır mıx, çəkic, iynə-sap, qayış və kəlbətin əlindədir.
Arıf kişi ömür yolundan danışır:
– Ailə vəziyyətimiz elə idi ki, toy etməyə, gəlin gətirməyə imkanımız yox idi. Həmişə zarafatla deyirəm ki, mən öz xoşbəxtliyimi 3 qəpiyə əldə etmişəm. Elmira xanımla qərara gəldik ki, tramvaya minib qaçaq. O vaxt tramvayın qiyməti 3 qəpik idi. Qoşulub qaçdıq və onu tramvayla Zığ yolunun üstündə Tağıyev kombinatının yanında yaşayan dayımgilə apardım...
İndi 50 ilə yaxındır ki, bir damın altında can deyib, can eşidirik. Tale bizə 3 qız övladı bəxş edib. Böyük qızım Arifə evdar qadındır, ortancıl Akifə Moskvada yaşayır, kiçiyimiz Ağabacı isə həkimdir. 6 nəvəm var, 2 nəvəm ali tibbi təhsil alır. Kiçik nəvəm Canulyanın 5, Baturayın 10 yaşı var.
Onun müştəriləri arasında məşhur futbolçu Anatoli Banişevski, bəstəkar Emin Sabitoğlu, Xalq artisti Mobil Əhmədov, rejissor Oqtay Mirqasımov kimi bir çox tanınmışlar olub.
72 yaşlı çəkməçinin təbirincə desək, gözəllik ayaqqabıdan başlayır, çünki ən gözəl geyim də yaraşıqsız, səliqəsiz görünən ayaqqabı ilə görkəmini itirir. Çarıqdan tutmuş təbii dəridən ən müasir ayaqqabılara qədər müxtəlif ayaq geyimləri tikən Arif Ağatalıbov isə bu gözəlliyin tamlığını qoruyan və onun keşiyində dayanan sadə bir sənətkardır.
Süleyman QARADAĞLI
