Azərbaycan millisinin sabiq hücumçusu minifutbol yığmasına çağırılıb

Futbol üzrə Azərbaycan millisinin sabiq hücumçusu Rauf Əliyev minifutbol yığmasına çağırılıb. SİA-nın məlumatına görə, çalışdırıcı Monteneqroda təşkil olunacaq təlim-məşq toplanışı üçün ötən gün 20 oyunçu dəvət etsə də, heyətdə bəzi dəyişikliklərə əl atdıqlarını söyləyib. O, Azərbaycan çempionatının yarımfinal mərhələsinin cavab görüşlərindən sonra da dəyişikliklərin olacağını istisna etməyib.

Komandaya yeni cəlb olunanlar arasında “İnter”in üzvü Rauf Əliyev də var. 35 yaşlı hücumçu 2010-2018-ci illərdə futbol üzrə Azərbaycan millisinin heyətində 46 oyun keçirib, 7 qol vurub.

Qeyd edək ki, minifutbol üzrə Azərbaycan yığması aprelin 24-dən mayın 2-dək Monteneqroda təlim-məşq toplanışında olacaq. Yığma aprelin 30-da Serbiya, Bosniya və Herseqovina, Rumıniya, Monteneqro və Albaniyanın qatılacağı turnirdə iştirak edəcək.