“Araz-Naxçıvan”ın baş məşqçisi Elmar Baxşıyev Azərbaycan Premyer Liqasının 21-ci turunda “Sumqayıt”a qarşı keçirdikləri oyunu şərh edib.
Arena.az xəbər verir ki, o, 0:0 hesabıyla başa çatmış matçdan sonra baş tutan mətbuat konfransında bunları söyləyib:
“İki fərqli hissə izlədik. Birinci hissədə komanda olaraq oyunumuz alınmırdı. Dəyişikliklərdən sonra oyunun ritmini ələ keçirməyi bacardıq. Bilirdik ki, ağır səfərdəyik. Bir xala da sevinmək lazımdır. Elə oyun gedirdi ki, məğlub da ola bilərdik, qalib də gələ bilərdik. Yenə də yolumuza davam edirik. Qarşıdakı oyunlara hazırlaşacağıq.
Vaqif Cavadovun gəlişindən sonra “Sumqayıt” daha dinamik, daha aqressiv oynayır. Təhlükəli komanda olduğunu bilirdik. Rəqibin üstün cəhətlərini də komandamıza göstərmişdik.
Məncə, bir xala görə də sevinmək lazımdır. Hər xal dəyərlidir. Xal itkisinin üzərində çox dayanmayacağıq. Daha çox qarşıdakı matçlara köklənəcəyik”.
Elmar Baxşıyev hakim qərarlarına və komandasının son turlardakı qeyri-sabit nəticələrinə də münasibət bildirib:
“80-ci dəqiqədə “Sumqayıt”ın qapısı qarşısındakı penalti epizodunu heç kim vurğulamır. Amma biz də baxırıq ki, dəqiq penaltidir. Nə VAR-a baxırlar, nə VAR-dan çağırırlar. Möhkəm komandayıq, bizi bu yolla əzmək istəyirlərsə, təəssüf ki, bu, onlarda istək olaraq qalacaq… Bizə qarşı diqqətli olsunlar. Komandama inanıram, möhkəm və sağlam kollektivimiz var. Öz iradəmizdən geri çəkilməyəcəyik. Məni maraqlandıran oyun keyfiyyətidir. Komandam o keyfiyyəti mənə geri qaytarmağa çalışır. Bəzən istədiyim olur, bu oyundakı kimi, 5-6 qol epizoduna girirsən, dəyərləndirə bilmirsən. Ona görə komandamı günahlandıra bilmərəm. Epizoddur, futboldur, futbolun yazılmamış qanunları var. Onunla barışmalısan”.
