.jpg)
Meydanəli Yolçiyev,
YAP Daşkəsən rayon təşkilatının sədri
Yanvarın 28-də keçirilmiş nəqliyyat məsələlərinə həsr olunmuş müşavirədə Zəngəzur dəhlizinin əhəmiyyəti bir daha vurğulandı. Bu dəhliz yalnız Azərbaycanın iqtisadi maraqları üçün deyil, həm də regionun logistik şəbəkəsinin inkişafı baxımından həyati əhəmiyyət daşıyır.
Prezident İlham Əliyev müşavirədəki çıxışında qeyd etdi ki, Zəngəzur dəhlizi Azərbaycanın layihəsidir və mütləq həyata keçiriləcək: “Zəngəzur dəhlizi layihəsi Azərbaycan tərəfindən irəli sürülmüşdür. İkinci Qarabağ müharibəsindəki Zəfərimizdən sonra bu məsələ beynəlxalq gündəliyə, beynəlxalq leksikona salındı və bu gün Zəngəzur dəhlizi artıq dünyada qəbul edilmiş ifadədir, qəbul edilmiş termindir. Əlbəttə ki, bu dəhlizin açılması üçün praktiki addımlar atırıq...”.
Bu dəhlizin beynəlxalq arenada qəbul olunmuş terminə çevrilməsi Azərbaycanın diplomatik səylərinin nəticəsidir. Lakin Ermənistan tərəfinin dörd ildən çox müddətdə qeyri-konstruktiv mövqe sərgiləməsi və razılaşmaları pozması layihənin həyata keçirilməsini ləngidir. Ermənistan müxtəlif bəhanələr gətirərək və qeyri-real layihələr təqdim etməklə regionda qeyri-sabitlik yaratmağa çalışır.
10 noyabr kapitulyasiya Bəyanatına əsasən, Ermənistan Azərbaycanın əsas hissəsi ilə Naxçıvan arasında maneəsiz nəqliyyat əlaqəsi təmin etməlidir. Lakin Ermənistan müxtəlif manipulyativ addımlarla bu öhdəliyi yerinə yetirmir. “Sülh kəsişməsi” kimi qeyri-ciddi layihələr irəli sürərək beynəlxalq ictimaiyyətin fikrini yayındırmağa çalışır. Halbuki Azərbaycanın razılığı olmadan bu layihələrin heç bir əhəmiyyəti yoxdur.
Müşavirədə Azərbaycanın son illərdə həyata keçirdiyi genişmiqyaslı nəqliyyat layihələri xüsusi vurğulandı. Ölkədə inşa edilən səkkiz beynəlxalq hava limanı, azad edilmiş ərazilərdə reallaşdırılan avtomobil və dəmir yolu layihələri Azərbaycanın regional və beynəlxalq nəqliyyat mərkəzinə çevrilməsinə şərait yaradır.
Son 20 ildə ölkədəki mövcud dörd hava limanı (Bakı, Naxçıvan, Gəncə və Lənkəran) yenidən qurulmuş, dörd yeni beynəlxalq hava limanı (Qəbələ, Zaqatala, Füzuli və Zəngilan) tikilmişdir. Cari il isə Laçında doqquzuncu beynəlxalq hava limanının açılışı planlaşdırılır. Bu hava limanları istənilən ağırlıqda yük və sərnişin təyyarələrini qəbul etməyə qadirdir. Xüsusilə azad edilmiş ərazilərdəki hava limanları Qarabağın dünyaya inteqrasiyasını sürətləndirir.
Azad edilmiş ərazilərdə 3400 kilometr uzunluğunda avtomobil yolları tikilmiş və ya yenidən qurulmaqdadır. Horadiz-Ağbənd dəmir yolunun 60 faizi, Bərdə-Ağdam dəmir yolunun isə 94 faizi artıq tamamlanmışdır. Eyni zamanda, 45 tunel, 447 körpü və 16 viaduk inşa olunur. Bu infrastruktur layihələri təkcə azad edilmiş ərazilərin deyil, bütövlükdə Azərbaycanın iqtisadi inkişafına təkan verir.
Müşavirədə Ermənistanın tranzit ölkə olmaq iddiasının real perspektivləri olmadığı qeyd olundu. Azərbaycan Naxçıvanla birbaşa və maneəsiz əlaqənin təmin edilməsini təkidlə tələb edir. Ermənistan bu tələbi yerinə yetirmədikcə, onun tranzit ölkə olmaq arzusu reallaşmayacaq. Dövlət başçısı bildirib ki, Ermənistan bundan sonra da dalan ölkə kimi davam edəcək və onların tranzit ölkəyə çevrilmə arzuları elə onların gözlərində qalacaq.
Azərbaycanın həyata keçirdiyi nəqliyyat layihələri təkcə daxili tələbatı qarşılamır, həm də beynəlxalq əməkdaşlıq üçün yeni imkanlar açır. Bu kontekstdə Zəngəzur dəhlizi yalnız Azərbaycan üçün deyil, həm də regionun digər ölkələri üçün strateji əhəmiyyət daşıyır. Bu layihənin həyata keçirilməsi regionda sabitliyin möhkəmlənməsi və iqtisadi əlaqələrin genişlənməsi üçün zəruri bir addımdır. Hər şey plan üzrə irəliləyir və bu layihələr Azərbaycanın regional liderliyini daha da möhkəmləndirəcək.
Yanvarın 28-də keçirilmiş müşavirə bir daha göstərdi ki, nəqliyyat sektorunun inkişafı Azərbaycanın strateji prioritetlərindən biridir. Zəngəzur dəhlizinin reallaşması, hava limanlarının istifadəyə verilməsi və genişmiqyaslı avtomobil və dəmir yolu layihələri Azərbaycanın regional və beynəlxalq arenadakı mövqeyini möhkəmləndirir. Ermənistanın qeyri-konstruktiv yanaşmasına baxmayaraq, Azərbaycan qarşıya qoyduğu məqsədlərə doğru əzmlə irəliləyir.
