Bakı Apellyasiya Məhkəməsində xuliqanlıq niyyəti ilə qəsdən sağlamlığa ağır zərər vurmada təqsirləndirilən Vahid Qədimovun (şərti) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Əli Məmmmədovun sədrliyi ilə keçirilən prosesdə qərar elan olunub.
Qərara əsasən, apellyasiya şikayəti təmin edilməyib.
İttihama görə, hadisə 2023-cü ildə Bakı şəhəri, Binəqədi rayonu, 9-cu mikrorayn, M.Cəlal küçəsində yerləşən 143A saylı binanın qarşısında qeydə alınıb.
Belə ki, paytaxt sakini, 2007-ci il təvəllüdlü Vahid Qədimov 2009-cu il təvəllüdlü, zərərçəkmiş Mahir Bəkirova (şərti) yaxınlaşaraq onunla mübahisə edib. Buna səbəb olaydan bir neçə gün əvvəl zərərçəkmişin həmin məhəllədə yaşayan azyaşlı V.V.-ni (şərti) vurması olub. Bu zaman Vahid bıçaqla Mahirin qarnından 1 dəfə vuraraq, ona xəsarət yetirib.
Bakı Ağır Cinayətlər Məhkəməsinin hökmü ilə Vahid Qədimov 6 il müddətə azadlıqdan məhrum edilib. Hökmdə qeyd edilib o, cəzasını yetkinlik yaşına çatmayanlar üçün penitensiar müəssisədə (kompleks) çəkəcək.
Kamal Məmmədov
