“Salbutamol” tərkibli aerozol dərmanının ölkəyə idxalı həyata keçirilmir.

Bu sözləri Səhiyyə Nazirliyi Analitik Ekspertiza Mərkəzinin İctimaiyyətlə əlaqələr və kommunikasiya şöbəsinin müdiri Mətin Məcidli astma xəstəliyindən əziyyət çəkən şəxslərin istifadə etdiyi dərmanın apteklərdə tapılmaması haqda danışarkən deyib.

Onun sözlərinə görə, ölkəyə dərman vasitələrinin gətirilməsi Səhiyyə Nazirliyi və onun qurumlarının səlahiyyətləri çərçivəsindən kənardır və əsasən müxtəlif özəl şirkətlər tərəfindən idxal edilir:

“Salbutamol” tərkibli aerozol dərman vasitələri barəsində tərəfimizdən ölkə ərazisində əczaçılıq fəaliyyəti ilə məşğul olan iri topdansatış idxalçı şirkətlərlə şifahi sorğu aparılıb. Sorğu zamanı şirkətlər bildirib ki, dərman vasitəsinin təsiredici maddəsi olmadığına görə istehsalçı şirkətlər tərəfindən sözügedən tərkibli dərman vasitəsinin istehsalında problemlər yaranıb. Bu səbəbdən də hazırda idxalı həyata keçirilmir”.

Mətin Məcidli əlavə edib ki, qeyd olunan dərman vasitəsinin eyni təsirə malik digər ticarət adı olan dərman vasitəsinə dəyişdirilməsi ilə bağlı xəstələrin müalicə həkiminə müraciət etmələri tövsiyə olunur.

Qeyd edək ki, astma xəstəliyindən əziyyət çəkən şəxslərin mütəmadi olaraq istifadə etdiyi “Salbutamol” dərmanı bir neçə aydır ki, ölkəyə gətirilmir. Sonuncu dəfə dərmanın kütləvi satışı dekabrda həyata keçirilib. Hazırda satışda az sayda qalan bu dərman apteklərdə öz qiymətindən (5 manat 40 qəpik) dəfələrlə baha qiymətə satılır.