“Bu gün həmin şəxslərin çöldə qaldığı hər dəqiqə Azərbaycan müstəqilliyinə təhlükədir”.
Bunu Yenicag.az-a açıqlamasında “Qafqazinfo”da sabiq nazirlər Əbülfəz Qarayev, Azad Rəhimov, Elmar Məmmədyarov, eyni zamanda Ramiz Mehdiyev haqqında yayılan ittiham xəbəri ilə bağlı fikirlərini bölüşən Müasir Müsavat Partiyasının (MMP) sədri Hafiz Hacıyev deyib.
Onun sözlərinə görə, hakimiyyətin daxilində pozuculuq fəaliyyəti ilə məşğul olan, Prezident İlham Əliyevin üzünə gülüb arxada xəyanət edənlər mövcuddur:
“O cümlədən istər Elmar Məmmədyarov, istər Əbülfəz Qarayev, istərsə də Ramiz Mehdiyevin də belə şəxslərdən olduğu ilə bağlı dəfələrlə xəbərdarlıq etmişəm. Bu siyahıya keçmiş milli təhlükəsizlik naziri Eldar Mahmudov da daxildir. Lakin hələ bunlar üzdə görünənlərdir. Amma hakimiyyətin daxilində kifayət qədər yüksək vəzifə tutan belə məmurlar var”.
H. Hacıyevin fikrincə. onlar dövlət başçısına xəyanət edib Rusiya kəşfiyyatına işləyirlər:
“İstəyirlər ki, Azərbaycanda dövlət çevrilişi etsinlər. Bu gün həmin şəxslərin çöldə qaldığı hər dəqiqə Azərbaycan müstəqilliyinə təhlükədir. Onlar təcili həbs edilməlidirlər. Nəcməddin Sadıkov da bu siyahıya əlavə olunmalıdır. Həmçinin Prezident Administrasiyasında da müəyyən adamlar var ki, saxlanılmalıdır. Bir sözlə, xalqı dövlətlə üz-üzə qoymaq istəyənlərin planlarını ürəklərində qoymaq lazımdır. Filankəs kiminsə qohumudur deyib keçmək olmaz. Dövlət dostluq, qohumluqla idarə olunmur. Prezidentimizin ətrafında bir olmalı, onu qorumalı, dəstək olmalıyıq”.
Nəsimi Ələsgərli
