"Coca-Cola" 2025-ci ildə Azərbaycanda 30 illik yubileyini qeyd etməyə hazırlaşır.
“Azerbaijan Coca-Cola Bottlers” MMC-nin baş direktoru Rəna Məmmədova bildirib ki, İsmayıllıda yeni zavodun tikilməsi “Coca-Cola”nın Azərbaycana olan uzunmüddətli investisiya öhdəliyini nümayiş etdirir. “Bu zavod yalnız yeni iş yerləri yaratmaqla kifayətlənmir, həm də yerli istehsalın artırılmasına imkan verəcək. Yeni fəaliyyətə başlayacaq müəssisəyə sərmayə qoymaq qərarımız ölkədə güclü iqtisadiyyata və əlverişli investisiya mühitinə olan möhkəm inamımızı bir daha təsdiq edir. Bu onun göstəricisidir ki, ölkədə yerli və xarici sərmayəçilər üçün dayanıqlı iqtisadi mühit mövcuddur”, - deyə o vurğulayıb.
Baş direktor onu da deyib ki, zavodun investisiya dəyəri 68 milyon manatdır. “Beynəlxalq keyfiyyət və təhlükəsizlik standartlarına cavab verən yeni istehsal müəssisəsi 15 hektar sahədə qurulur və burada 100-dən artıq sakinin işlə təmin edilməsi planlaşdırılır. İllik istehsal gücü 165 milyon litr olacaq müəssisədə şirkətin “Coca-Cola”, “Fanta”, “Sprite” kimi brendləri istehsal olunacaq. Yeni zavod, əsasən, daxili bazar ehtiyaclarını təmin etmək üçün nəzərdə tutulub. Əminəm ki, yeni müəssisənin fəaliyyətə başlaması yerli təchizatçılara daha çox biznes imkanı verəcək, dövlət büdcəsinin vergi gəlirlərini artıracaq və yerli infrastrukturun güclənməsinə təkan verəcəkdir”, - deyə o əlavə edib.
Qeyd edək ki, şirkətin inkişaf planı çərçivəsində 2025-ci ildə “Coca-Cola”nın Azərbaycanda ikinci istehsal müəssisəsinin açılması planlaşdırılır.
