Lökbatan - Qobu yolunda işıqlandırma dirəkləri olsa da, iki aydır axşam düşən kimi yol zülmətə qərq olur.
hakimiyyet.az xəbər verir ki, bununla bağlı sürücülərdən biri sosial şəbəkədə paylaşım edib.
O bildirib ki, yolu əhatə edən hər iki tərəf yaşayış sahəsidir və bəzi hissələrdə piyada keçidi yoxdur.
"İşıqlandırma olmadığı üçün axşam saatlarında qəza vəziyyətinin yaranma ehtimalı artır", - deyə sürücü qeyd edib.
Mövcud problemlə bağlı Abşeron Rayon İcra Hakimiyyətindən hakimiyyet.az-ın sorğusuna cavab olaraq bildirilib ki, həmin ərazidə kabel xəttində qəza baş verib:
"Bununla bağlı lazımi materialların alınması istiqamətində sifariş verilib. Yaxın günlərdə təmirə başlanılacaqdır".
Qaradağ Rayon İcra Hakimiyyətindən isə hakimiyyet.az-a deyilib ki, Lökbatan - Qobu yolunun Qaradağ rayonu ərazisindən keçən hissəsinin işıqlandırılması ilə bağlı aidiyyəti üzrə təkliflər verilib və işlərin həyata keçirilməsinə cari ildə başlanılacaq.
Aləmdə Nəsib
