ABŞ prezidenti Donald Tramp və Rusiya lideri Vladimir Putin arasında Ukraynadakı münaqişənin həlli ilə bağlı danışıqlar şok razılaşmaya gətirib çıxaracaq.
Publika.az xəbər verir ki, bu barədə ABŞ-ın vitse-prezidenti J.D.Vens “The Wall Street Journal”a (WSJ) müsahibəsində bildirib.
“Düşünürəm ki, bir çox insanı şoka salacaq sövdələşmə olacaq. O, (Tramp) “Hər şey masadadır, gəlin danışıqlar aparaq” deyəcək”, - ABŞ vitse-prezidenti bildirib.
O, həmçinin qeyd edib ki, Ukraynanın hansı hissəsinin Rusiyanın tərkibində qalacağını və ya ABŞ və digər Qərb müttəfiqlərinin Kiyevə hansı təhlükəsizlik zəmanəti verə biləcəyini söyləmək hələ tezdir. Siyasətçi aydınlaşdırıb ki, bu detallar sülh danışıqları zamanı işlənməlidir.
“Bir çox formalar və konfiqurasiyalar var, lakin biz Ukraynanın suveren müstəqilliyindən narahatıq”, - deyə o, yekunlaşdırıb.
Donald Trampın Rusiya ilə danışıqlar barədə açıqlaması Rusiya Prezidenti Vladimir Putinə çoxdan tələb etdiyi şeyi verdi: Ukrayna üzrə ABŞ-la birbaşa danışıqları.
Publika.az xəbər verir ki, bu barədə "Voll Strit Jurnal" yazıb.
Bildirilib ki, Kreml uzun müddətdir Ukraynanı və onun avropalı müttəfiqlərini bu cür danışıqlardan kənarlaşdırmağa çalışır. Moskva eyham vurub ki, Vaşinqton müharibənin uzadılmasına görə məsuliyyət daşıyır və buna görə də yalnız o, Rusiya Federasiyası ilə müharibəni dayandırmaq üçün danışıqlar apara bilər.
“Amma əgər biz Putinin Ukrayna ilə bağlı bəyan etdiyi mövqeləri rəhbər tutsaq, o zaman Trampın vəd etdiyi danışıqlar uzunmüddətli olacaq. Rusiya atəşkəsə o halda razılaşacaq ki, ABŞ Ukraynaya dəstəyi dayandırsın və onun ərazisini müdafiə etmək imkanlarına məhdudiyyətlər qoyulsun”, - nəşr yazıb.
Hərbi ekspertlər əlavə ediblər ki, Rusiya əlində olan canlı qüvvə və silahlarla Ukraynaya qarşı ən azı il yarım mübarizəni davam etdirə bilər.
Bu arada, dünən Kremldə bayram olub. Aparıcı rus təbliğatçısı Olqa Skabeyeva "Putin hamı üzərində qələbə qazandı" deyib və məşhur "Komsomolskaya Pravda" tabloidi "Tramp Zelenskinin ölüm əmrini imzaladı", - deyə yazıb.
Nəşr qeyd edib ki, əslində Putin üçün Trampın danışıqlar aparmaq vədi üç illik amansız döyüşlərdən sonra Rusiyanın şərtləri ilə müharibəyə son qoymaq yolunda ilk addımdır.
Bu və gündəmdəki bir çox xəbərləri aparıcı Sevinc Telmanqızının təqdimatındakı “Canlı debat” verilişində müzakirə edəcəyik. Qonağımız ATLAS Araşdırmalar Mərkəzinin rəhbəri Elxan Şahinoğludur. Müzakirədə tamaşaçılarımız da iştirak edə bilər.
